Það heldur eflaust aftur af mörgum að heimsækja fjarlæg lönd að það tekur ansi langan tíma að komast þangað. 20 klukkustunda flugferðir eru ekki spennandi og það er heldur ekki spennandi að þurfa að millilenda og jafnvel bíða klukkustundum saman á flugvöllum. En nú styttist hugsanlega í að hægt verði að stytta ferðatíma heimsálfa á milli mikið, mjög mikið.

Nú tekur um 20 klukkustundir að fljúga frá Evrópu til Ástralíu og er tíminn sem fer í millilendingar ekki talinn með. En eftir aðeins 11 ár verður hugsanlega hægt að fljúga frá Bretlandi til Ástralíu á aðeins fjórum klukkustundum.

Samkvæmt frétt CNN tilkynnti breska geimferðastofnunin í síðustu viku að hún ætli að starfa með áströlsku geimferðastofnuninni að verkefni sem nefnist „heimsins fyrsta geimbrú“.

Í Oxfordskíri á Englandi er fyrirtækið Reaction Engines til húsa. Þar hefur verið þróaður nýr eldflaugahreyfill, Sabre, sem er grunnstoðin í fyrrnefndu samstarfi. Í apríl tilkynnti Reaction Engines að tilraunir sýndu að hreyfillinn gæti náð rúmlega 4.000 km/klst en það er rúmlega þrefaldur hljóðhraði.

En þegar flogið er svona hratt hitnar hreyfillinn mjög mikið og því skiptir miklu máli að geta kælt hann og það er verkefnið sem framundan er. Reiknað er með að hreyflar þessarar tegundar verði tilbúnir til notkunar 2030.