Sjónvarpsfréttamaður í Sacramento í Kaliforníu hefur verið rekinn úr starfi fyrir vægast sagt óboðlega hegðun á bílasýningu í borginni á dögunum.

Þeir sem eiga gamla og fágæta bíla gera ýmislegt til að koma í veg fyrir að þeir rispist eða dældist en umræddur sjónvarpsfréttamaður var lítið að spá í það eins og sést á meðfylgjandi myndbandi sem vakið hefur talsverða athygli.

Angel Cardenas var staddur á Sacramento International Auto Show þar sem gamlar glæsikerrur í bland við nýja bíla voru sýndir. Angel var þarna á vegum KDAX-sjónvarpsstöðvarinnar í Sacramento og fékk hann að kíkja á bílaflotann áður en sýningin var formlega opnuð.

Í innslagi sínu stökk Angel meðal annars upp á skottið á gulum Thunderbird en slíkt er að sjálfsögðu stranglega bannað, jafnvel dauðasynd í augum allra hörðustu bílaáhugamanna. Þá rak hann hurðina á öðrum gömlum bíl utan í hurðina á öðrum Thunderbird. Hann endaði svo innslagið á að stökkva upp á splunkunýjan Ford-jeppa.

Forráðamenn bílasýningarinnar kvörtuðu undan hegðun Angel á sýningunni og fengu þeir þau svör að hann hefði verið rekinn umsvifalaust úr starfi. Stacey Castle Bascom, framvæmdastjóri sýningarinnar, segir að sem betur fer hafi enginn bílanna skemmst.