Lögreglan í Osló var með mikinn viðbúnað í morgun eftir að maður stal sjúkrabíl í borginni og ók honum meðal annars á vegfarendur. Í frétt VG kemur fram að kona og sjö mánaða barn hennar, sem var í barnavagni, hafi verið flutt á sjúkrahús sem og eldri hjón sem voru á gangi í Sandaker.
Ekki er vitað hvort alvarleg slys hafi orðið á fólki.
Tilkynning um málið barst lögreglu klukkan 12:30 að staðartíma, 10:30 að íslenskum. Lögregla veitti manninum eftirför og á myndbandi sem birt var á YouTube má sjá þegar lögregla reynir að skjóta á bílinn. Að sögn norskra fjölmiðla hefur lögregla handtekið ökumanninn en lögregla leitar annars manns sem talinn er hafa verið viðriðinn málið.
