Þann 1. ágúst 1951 rann fyrsta eintakið af Toyota Land Cruiser af færibandi Toyotaverksmiðjunnar. Þetta reyndist vera upphafið að því sem margir segja best heppnaða bíl Toyota frá upphafi. Bílarnir hafa selst vel á þeim 68 árum sem eru liðin frá því að sá fyrsti rann af færibandinu. Þann 31. ágúst á þessu ári náðist sögulegur áfangi en þá var búið að framleiða 10 milljónir eintaka af þessari tegund.

Flestir hafa eflaust séð Land Cruiser á götum hér á landi en þeir sjást einnig oft í sjónvarpinu því bílarnir eru til dæmis notaðir af Sameinuðu þjóðunum og Rauða krossinum. Sérsveitir lögreglu nota þá oft og þeir eru notaðir í eyðimörkum og til ferðalaga á heimskautunum.

Það má því kannski segja að Land Cruiser sé orðinn einhverskonar goðsögn í bílaheiminum.

Bíllinn hefur að vonum breyst í gegnum tíðina og verið aðlagaður kröfum nýrra kynslóða en án þess að dregið hafi verið úr aksturseiginleikum hans og nytsemi við margvíslegar aðstæður.

Í upphafi voru aðeins 100 bílar fluttir frá Japan árlega en 1965 var fjöldinn kominn yfir 10.000 á ári. Í dag eru Land Cruiser bílar seldir í 170 löndum og seljast um 400.000 bílar árlega.