Hópur öfgasinnaðra íslamista, dæmdir hryðjuverkamenn og menn sem hafa barist í stríðinu í Sýrlandi tengjast umfangsmikilli svikamyllu með skattgreiðslur í Danmörku undanfarið ár. Þeir virðast hafa svikið ríkissjóð um háar fjárhæðir.

Jótlandspósturinn og Dagbladet Information skýra frá þessu. Fram kemur að 14 menn tengist málinu og hafi þeim tekist að svíkja rúmlega 800 milljónir danskra króna undan skatti. Þetta er bæði virðisaukaskattur og tekjuskattur. En mennirnir létu ekki þar við sitja því þeir hafa einnig leikið sama leik í Þýskalandi og Svíþjóð.

Tveir þeirra eru öfgasinnaðir íslamistar sem tengjast al-Kaída og Íslamska ríkinu.

Mennirnir stofnuðu fyrirtæki sem söfnuðu upp stórum skuldum vegna virðisaukaskatts og tekjuskatts og voru síðan lýst gjaldþrota. Auk ríkissjóðs skulduðu fyrirtækin mörgum einkafyrirtækjum háar fjárhæðir.

Sérfræðingar óttast að hluti fjármunanna hafi verið notaður til að fjármagna hryðjuverkastarfsemi en þó liggja engar beinar sannanir fyrir um það.