Forstjórar tæknifyrirtækja og verkfræðingar vilja setjast að á tunglinu. Verkefni nefnist Open Lunar og hófst sem hugmynd sem var varpað fram fyrir nokkrum árum. Það eru því fleiri en geimferðaþjóðir heims og einkarekin geimferðafyrirtæki sem hafa áhuga á tunglinu þessa dagana.

Open Lunar samtökin samanstanda að mestu af forstjórum tæknifyrirtækja og verkfræðingum sem vilja flytja til tunglsins. Bloomberg skýrir frá þessu.

Margir viðkomandi hafa starfað hjá bandarísku geimferðastofnuninni NASA og þeir vilja nú breyta gangi mála þannig að það séu ekki bara einstök ríki sem reyni að koma upp varanlegri búsetu á tunglinu. Open Lunar vill þróa tækni til að rannsaka tunglið og til að fólk geti búið þar saman.

„Æðsta markmið okkar er að búa til friðsamlega búsetu á tunglinu þar sem fólk starfar saman.“

Sagði Chelsea Robins, forstjóri Poen Lunar, í samtali við Bloomberg.

Upphafið að Open Lunar má rekja til nokkurra vina í Silicon Valley í Kaliforníu sem fengu þessa hugmynd og áttuðu sig á að hugsanlega væri hægt að koma upp litlu samfélagi á tunglinu fyrir tvo til þrjá milljarða dollara. Þetta virðist há upphæð en samtökin eru sannfærð um að þeim takist að útvega þetta fjármagn þar sem margir auðmenn séu áhugasamir um tunglið og geiminn.