Henni hefur tekist að ná töluverðum bata og getur nú gengið, borðað og talað á nýjan leik en glímir enn við mörg vandamál. Þetta kemur fram í viðtali Aftonbladet-tv við hana. Þar segir hún að líðan hennar sé mjög misjöfn á milli daga, hún viti aldrei hvernig morgundagurinn verður. Hún verði sífellt að gæta að sér og tryggja að hún fái næga hvíld. Þessi 36 ára fyrrum hnefaleikakona er með stöðugan höfuðverk eftir höggið örlagaríka og mun hann fylgja henni til æviloka.
Það var hin ástralska Diana Prazak sem veitti henni hið örlagaríka vinstrihandar högg í áttundu lotu. Frida var strax flutt á sjúkrahús og hefur barátta hennar verið erfið eftir þetta og er hún fjarri því að hafa náð fullri heilsu. Í janúar hneig hún niður og var flutt í skyndi á sjúkrahús og hún veit aldrei hvenær næsta áfall ríður yfir. Hún segist þó ekki sjá eftir að hafa stundað hnefaleika, líf hennar hafi snúist um þá.
Hún var á góðri leið á toppinn þegar höggið reið yfir. Hún hafði þénað háar upphæðir en þær hurfu allar eins og fyrr sagði á meðan hún lá meðvitundarlaus á sjúkrahúsi. Þjálfarar hennar, umboðsmenn og mótshaldarar höfðu látið greipar sópa því þeir vildu fá sinn hluta af kökunni. Óþekktur velgerðarmaður gaf henni stóra upphæð sem gerði hana skuldlausa og gerði henni kleift að komast í gegnum hið daglega líf með dóttur sinni, sem var sex ára þegar höggið reið af, og syni sem kom síðar til sögunnar.
