Sænskir fjölmiðlar, þar á meðal Aftonbladet og Sydsvenskan, skýra frá þessu. Fram kemur að elsta barnið komst á skólaskyldualdur árið 2007 og var skráði í skóla Ystad en mætti aldrei í hann. Tveimur árum síðar náði næsta barn skólaskyldualdri en þá tilkynntu foreldrarnir að þau ferðuðust mikið starfa sinna vegna og af þeim sökum myndu börn þeirra stunda nám við bandarískan internetskóla. Fræðsluyfirvöld tóku þetta ekki gilt og bæði börnin voru kölluð í skóla 2009.
Foreldrarnir brugðust við þessu með því að tilkynna börnin veik og fengu staðfestingu læknis á því. Á fundi með fræðsluyfirvöldum var síðan ákveðið að börnin myndu vera undanþegin skólagöngu í Svíþjóð þar sem þau dveldu mikið erlendis.
Næstu níu árin fór ekki mikið fyrir fjölskyldunni en 2018 dró til tíðinda. Þá fóru skattayfirvöld að undrast lögheimilisskráningu hennar. Þá uppgötvaðist að fjölskyldan hafði fengið félagslegar bætur greiddar í öll þessi og ekkert benti til að þau væru í störfum sem krefðust langra dvala erlendis. Rannsókn skattayfirvalda leiddi einnig í ljós að börnin höfðu ekki átt gild vegabréf í fjögur ár og hjá sænska sendiráðinu í Washington hafði enginn heyrt um þessa fjölskyldu. Í kjölfarið voru börnin tekin úr umsjá foreldra sinna.
Sydsvenskan hefur fjallað ítarlega um mál fjölskyldunnar og lygar foreldranna. Meðal annars hefur komið fram að þau hafi bæði sótt mörg námskeið í trúarfræði en hafi aldrei lokið þeim. Þau hafa sagt yfirvöldum að þau hafi verið virk í kirkjustarfi barna og ungmenna en enginn í viðkomandi kirkju kannast við þau. Í hvert sinn sem yfirvöld settu sig í samband við hjónin frá 2009 til 2018 sendu þau alltaf ný skjöl sem áttu að sanna að börnin væru í bandarískum skóla.
Þetta endaði með að samband var haft við umræddan skóla en þar hafði enginn heyrt um börnin né foreldra þeirra og hvað þá séð þau.
Ákæra á hendur hjónunum verðu fljótlega tekin fyrir hjá dómstóli á Skáni. Þar munu þau þurfa að skýra af hverju þau héldu börnum sínum í einangrun í níu ár.
