Það voru filippeyskir vísindamenn sem gerðu þessa merku uppgötvun í helli á eyjunni Luzon. Skýrt er frá uppgötvuninni í vísindaritinu Nature. Í greininni er þessari nýju tegund gefið nafnið Homo luzonensis eftir eyjunni þar sem beinin fundust. Þau eru úr þremur einstaklingum. Þrjár tennur og sex lítil bein fundust.
Þessi tegund er nýjasta viðbótin við Homo tegundina en til hennar teljast meðal annars Homo neanderthalensis, Homo erect og auðvitað Homo sapiens sem er eina núlifandi tegundin í þessari fjölskyldu. Talið er að fólk af Homo luzonensis tegundinni hafi ekki verið hærra en 1,20 sm.
Það var filippeyski fornleifafræðingurinn Armand Mijares sem fann beinin og tennurnar 2007. Hann hélt í fyrstu að hann hefði fundið leifar af dýrum og bað vin sinn, Philip Piper dýrafræðing, um að finna út af hvaða dýrum beinin væru. En fljótlega var ljóst að hér var ekki um dýraleifar að ræða.
„Á öðrum degi vinnunnar með beinin fann ég millfótabein úr manneskju.“
Sagði Piper í samtali við The Washington Post. Það lá því fljótlega ljóst fyrir að hér var ekki um dýrabein að ræða.
Piper og Mijares birtu vísindagrein um þennan merka fund 2010 en það er fyrst nú sem ljóst er að beinin eru úr nýrri og sjálfstæðri tegund manna.
Líkamlega séð hefur Homo luzonensis verið blanda af líkamlegum einkennum fyrstu tegunda manna og þeim sem á eftir komu.
Vísindamenn velta nú vöngum yfir hvernig tegundin hafi komist til eyjunnar Luzon. Því hefur verið velt upp að þetta geti þýtt að frumstæðir ættingjar manna hafi farið frá Afríku til Suðaustur-Asíu en fram að þessu hefur verið talið að það hafi ekki verið hægt. Hugsanlega komst fólkið á fleka til eyjunnar eða þá að því hafi skolað með flóðbylgju.
Florent Détroit, hjá franska náttúrufræðisafninu í París, segir að margir vísindamenn telji að tilviljun hafi valdið því að fólkið endaði á eyjunni því það hafi ekki verið nægilega gáfað til að ferðast yfir hafið á fleka eða öðru farartæki.
„En staðreyndin er að við höfum nú sífellt fleiri sannanir fyrir að þeim tókst giftursamlega að koma sér fyrir á mörgum eyjum í Suðaustur-Asíu fyrir löngu síðan svo þetta var líklegast ekki heppni.“
Sagði hann í samtali við The Guardian.
