„Það hefur lengi verið hægt að meðhöndla mígreni. Vandinn hefur bara verið að það hefur verið gert með lyfjum sem hafa verið þróuð til einhvers allt annars.“
Hefur BT eftir Jakob Møller Hansen, taugalækni og yfirlækni dönsku höfuðverkjarannsóknarmiðstöðvarinnar.
„Nú höfum við öðlast meiri skilning á hvað veldur mígreni og ferlinu á bak við það og hvernig er hægt að stöðva það. Í staðinn fyrir að lina sársaukann þá veitum við nú meðferð.“
Dönsk rannsókn varð til þess að þau efni í líkamanum, sem valda mígreni, fundust. Þau kallast CGRP. Nú hefur verið búið til mótefni við þeim sem heitir Erenumab en það getur hindrað CGRP í að valda mígreni.
„Já, mér finnst þetta vera bylting á þessu sviði og þátttakendur í tilraunum okkar hafa verið mjög ánægðir með meðferðina. Sumir hafa meira að segja haft samband við okkur strax að tilraunum loknum til að biðja um meira af lyfinu þrátt fyrir að þeir hafi vitað að við gátum ekki, því miður, látið þá fá meira af því.“
Sumir þátttakenda hafa sagt að nýja meðferðin hafi verið eins og opinberun og eiginlega sé þetta of gott til að geta verið satt.
Þess er vænst að lyfið komi á markað í Bandaríkjunum í haust og væntanlega líður þá ekki á löngu þar til það kemur á markað í Evrópu.
