Á ellefta tímanum í gærkvöldi fannst kornabarn eitt og yfirgefið í almenningsgarði í austurhluta Lundúnaborgar. Barnið, sem er stúlka, var strax flutt á sjúkrahús og er ástand hennar sagt „stöðugt þessa stundina“. Hiti var um frostmark þegar stúlkan fannst.

Sky skýrir frá þessu. Fram kemur að stúlkan hafi fundist í Newham seint í gærkvöldi. Lögreglan hefur biðlað til almennings um upplýsingar og segist hafa miklar áhyggjur af móður stúlkunnar. Þá beindi lögreglan orðum sínum beint til móðurinnar og hvatti hana til að setja sig strax í samband við lögregluna, sjúkrahús eða heimilislækni. Það sé mikilvægt að fá fullvissu fyrir að það sé í lagi með hana.