Það er engum ofsögum sagt að tilhlökkun hafi ríkt hjá Jennifer og Frank Massabki fyrir ferðalaginu til Mexíkó sem þau fóru í fyrir skemmstu. Jennifer og Frank voru nýbúin að trúlofa sig og ákváðu að skella sér til Mexíkó til að finna stað fyrir brúðkaupið.
Það var í maí í fyrra sem Jennifer og Frank skelltu sér til Mexíkó. Þau flugu frá heimalandi sínu, Bandaríkjunum, og beint til Mexíkóborgar þar sem þau leigðu bílaleigubíl hjá bandarísku fyrirtæki. Þau héldu svo af stað á vit ævintýranna, óku burt frá ysi og þysi borgarinnar og út í sveitina.
Jennifer og Frank höfðu þó ekki verið nema klukkustund á ferðinni þegar annarri bifreið var ekið aftan á þeirra bifreið. Frank, sem ók bílnum, stöðvaði ferðina til að ræða við ökumanninn. Það var þá sem ferðalagið breyttist í martröð. Tveir vopnaðir menn stigu út úr bifreiðinni og skipuðu Jennifer og Frank að koma með þeim.
Bundið var fyrir augu þeirra og allir skartgripir sem þau báru á sér, trúlofunarhringarnir þar á meðal, voru teknir og þeim var ekið á afvikinn stað gegn vilja þeirra.
MarketWatch fjallaði um sögu þeirra og í umfjölluninni kom fram að Jennifer og Frank skilji bæði spænsku og hafi því getað skilið hvað fór á milli mannræningjanna. Ljóst var að þeir ætluðu að krefjast lausnargjalds fyrir þau. Og það var einmitt það sem kom á daginn.
Ekki leið á löngu þar til mannræningjarnir sögðu Jennifer og Frank að hugsa um einstaklinga sem gætu borgað fyrir lausn þeirra. Meðan á prísundinni stóð urðu Jennifer og Frank fyrir ofbeldi og segir Jennifer að einn mannanna hafi reynt að nauðga henni. Eftir að hafa verið haldið í nokkrar klukkustundir gegn vilja sínum tókst Frank að flýja og hafa samband við lögreglu. Þegar lögregla kom á staðinn voru ræningjarnir á bak og burt.
Sjá einnig: Ekkert lát á morðöldunni í vinsælli ferðamannaparadís: 5 lík fundust í bíl
Jennifer nefbrotnaði í átökum við árásarmennina og gekkst undir aðgerð þegar komið var heim til Bandaríkjanna. Í umfjöllun MarketWatch segjast þau stíga fram og segja sögu sína til að vara aðra ferðalanga við hættunum sem kunna að fylgja því að ferðast til landa á borð við Mexíkó. Cancun og aðrir ferðamannastaðir í Mexíkó eru sérstaklega vinsælir meðal bandarískra ferðamanna en þó, því miður, ekki hættulausir. Hefur bandaríska utanríkisráðuneytið meðal annars sent frá sér viðvörun til þeirra sem eru að hugleiða ferðalög til Mexíkó.
