Dönsk yfirvöld hafa ekki hugmynd um hvar nokkur hundruð útlendingar, sem áttu að dvelja í Kærshovedgården miðstöðinni, eru. Í miðstöðinni eiga þeir útlendingar að dvelja sem ekki hafa dvalarleyfi í Danmörku en ekki er hægt að senda úr landi af ýmsum ástæðum. Til dæmis getur staðan verið sú að ekki þyki óhætt að senda þá til heimalanda sinna ef dauðarefsingar eru í gildi þar.

Frá því í mars 2016 þar til í nóvember á þessu ári hafa 447 útlendingar, sem voru skráðir í miðstöðinni, horfið þaðan og vita yfirvöld ekki hvar meirihluti þessa fólks heldur sig. Ekki er vitað um 328 þeirra. Nokkrir hafa fengið dvalarleyfi og 35 hafa verið fluttir úr landi.

Þegar miðstöðin var sett á laggirnar voru ein helstu rök ríkisstjórnarinnar fyrir því að þá væri hægt að hafa stjórn á þeim útlendingum sem Danir sitja í raun uppi með þar sem ekki er hægt að koma þeim úr landi. Ljóst er að þetta hefur alls ekki gengið eftir.