Þegar Bretar ganga úr ESB fellur úr gildi ákvæðið um frjálsa för íbúa ESB til og frá landinu. Talið er að um 500.000 manns frá ríkjum ESB hafi starfað við láglaunastörf á Bretlandseyjum á síðasta ári, þar á meðal er fólk sem starfar við þrif, þjónar og ávaxtatínslu.
Bresk stjórnvöld eru nú að reyna að finna út hvernig sé hægt að tryggja að atvinnurekendur sem treysta á erlent vinnuafl lendi ekki í vandræðum með að fá starfsfólk eftir Brexit.
Þetta kemur fram í nýrri skýrslu frá Oxford Migration Observatory. Þar er bent á tvær lausnir á þessum vanda. Önnur er að útvíkka áætlun um „hreyfanleika ungmenna“ þannig að hún nái til ESB-ríkjanna en hin er að taka upp sérstakt atvinnuleyfiskerfi sniðið að láglaunastörfum.
Varað er við hættum sem fylgja báðum þessum möguleikum. Hvað varðar atvinnuleyfakerfið er varað við að „ófyrirleitnir atvinnurekendur muni notfæra sér varnarlaust verkafólk“ á þeim grunni að fólkið fái aðeins að vera í landinu ef það er með vinnu.
Hvað varðar ungmennaáætlunina er varað við að ekki sé víst að unga fólkið sæki í störf sem breskir atvinnurekendur eiga að jafnaði erfitt með að manna.
