Þeir Zak Bolland, 23 ára, og David Worrall, 25 ára, hafa verið dæmdir í fjórfalt lífstíðarfangelsi af dómstól í Manchester á Englandi. Þeir voru sakfelldir fyrir að hafa kveikt í heimili Pearson-fjölskyldunnar í Walkden í Manchester í desember. Fjögur ung börn létust í eldsvoðanum. Samverkakona þeirra félaga, Courtney Brierley, 20 ára, var dæmd í 21 árs fangelsi fyrir hlutdeild í ódæðinu.

Samkvæmt dómsorði á Bolland fyrst möguleika á reynslulausn eftir 40 ár. Worrall á möguleika á reynslulausn eftir 37 ár.

Félagarnir notuðu bensínsprengju til að kveikja í heimili Pearson-fjölskyldunnar en Bolland taldi sig eiga eitthvað sökótt við elsta soninn á heimilinu, Kyle 17 ára, en þeir höfðu átt í deilum.

Demi 15 ára, Brandon 8 ára og Lacie 7 ára létust í eldsvoðanum þann 11. desember síðastliðinn. Systir þeirra, Lia 3 ára, lést á sjúkrahúsi tveimur dögum síðar af völdum áverka sem hún hlaut í eldsvoðanum. Móðir barnanna, Michelle Pearson, hefur verið á sjúkrahúsi síðan þetta gerðist en hún var í dái mánuðum saman.

Slökkviliðsmenn fundu Brandan liggjandi á grúfu í svefnherbergi hans og virtist sem hann hefði verið að reyna að skríða út. Rétt fyrir aftan hann var Lacie sem virðist hafa reynt að elta bróður sinn. Demi fannst í koju og virðist hafa verið að teygja sig upp í opinn glugga. Lia fannst í baðkarinu en móðir hennar hafði komið henni fyrir þar.

Á upptökum úr eftirlitsmyndavélum sáust Bolland og Worrall þegar þeir komu að húsinu um klukkan 5 að nóttu. Þeir köstuðu tveimur bensínsprengjum inn um eldhúsgluggann og flúðu síðan af vettvangi.

Lögreglan hefur verið gagnrýnd fyrir að hafa ekki tekið Michelle Pearson alvarlega þegar hún hringdi í neyðarlínuna kvöldið áður eftir að henni höfðu borist margar hótanir frá Bolland en þau þekktust síðan í grunnskóla. Bolland hafði áður hlotið tvo dóma fyrir líkamsárásir en þrátt fyrir það ræddu lögreglumenn ekki við hann.

Óháð rannsóknarnefnd um störf lögreglunnar rannsakar nú viðbrögð lögreglunnar í Manchester við tilkynningu Michelle.