Viðbrögðin stóðu ekki á sér í gær þegar Magnús nokkur spurði innan Facebook-hópsins Matartips hvort fólk ætti sér sakbitna sælu í matarræði. Með færslunni deildi hann mynd af vægast sagt ókræsilegum rétti, hráum fisk og bönunum.
Mynd af þessu má sjá hér fyrir neðan en rétt er að taka fram að myndin hefur verið í deilingu í nokkur ár og því allar líkur á því að Magnús sé að grínast. Raunar hefur verið nokkur umræða um það innan hópsins að grín væri orðið alsráðandi og of lítið um alvarlega umræðu um mat.
Hvað sem því líður, þá er ljóst að matgæðingum fannst þetta ekki girnilegt og hafa nú um 140 athugasemdir verið skrifaðar við færsluna. „Úff.. þetta er með því ógirnilegra sem ég hef séð,“ segir ein kona. Önnur kona skrifar svo: „Ég verð andvaka eftir þetta. Þetta mun elta mig um ókomna tíð! En verði þér að góðu.“
Sumir virðast þó jákvæðnari fyrir þessu viðbjóðs rétt. „Í blandara með þetta og þá ertu kominn með drykk,“ segir ein kona. Önnur virðist hafa fengið sér svipaðan rétt. „Ja ég hef gert þetta oft. elska svona sætt á móti söltu.“ Maður nokkur virðist svo hafa prófað álíka rétt og mælir með honum. „Hafið þið aldrei prufað að sneiða ferska banana á soðna Þorsk hnakka? Það er eins fáránlegt og það hljómar geggjað!“
Einn maður gengur jafnvel svo langt að koma þessum rétti til varnar. „Eruð þið sum í alvöru að tuða yfir því hvað „þetta er ógeðslegt“? Það er til fólk, og alveg þónokkur stykki, sem nýtur þess kynferðislega að tyggja kúk – þannig að, hvað er að ykkur? Hvað kemur ykkur við hvað öðrum þykir gott?“ spyr sá maður.
Sjálfur Fiskikóngurinn, Kristján Berg, kveður sér hljóðs og virðist forviða. „Fyrir minn smekk þá lítur þetta ekki girnilega út. Er samt forvitinn. Hvað í ósköpunum er þetta?“ spyr Kristján.