Vanessa Hudgens er með puttann á púlsinum. Hún fylgir tveimur vinsælustu mataræðunum í dag, ketó og tímabundinni föstu (intermittent fasting). Hins vegar fylgir hún ekki báðum kúrunum á sama tíma. Hún segir frá þessu í viðtali við People.
Vanessa flakkar á milli þess að vera ketó eða fylgja tímabundinni föstu.
Ketó er lágkolvetnamataræði. Tímabundin fasta, eða intermittent fasting eins og það er betur þekkt, er ekki beint mataræði heldur máltíðarmynstur. Vinsælast er 16:8, en þá fastar fólk í 16 klukkutíma og borðar í 8 klukkutíma. Til dæmis fastar manneskja frá 20:00 til 12:00 næsta dag, og borðar frá 12:00-20:00.
Vanessa, 30 ára, fastar venjulega í átján tíma og borðar í sex tíma. Hún byrjaði að fylgja tímabundinni föstu í október 2018. Hún sagði ástæðuna vera að þetta virkaði svo vel fyrir vin hennar.
„Ég hef mikið verið að fasta tímabundið. Því ég elska pasta, ég elska pítsu og þegar ég borða ekki kolvetni þá líður mér eins og lítill hluti af mér deyr,“ sagði Vanessa við People.
Hún borðar á hverjum degi frá 12:00-18:00 og fastar svo í átján tíma.
„Tímabundin fasta er frábær. Því þegar ég fasta – fyrstu tvær vikurnar eru klárlega mjög erfiðar, ég ætla ekki að ljúga, en eftir það þá er ég meira jarðbundin og kröftugri á æfingum. Ég fæ þau næringarefni sem ég þarf þegar ég borða, en ég borða líka það sem ég vil,“ segir Vanessa.
En að borða í aðeins sex tíma á dag getur verið erfitt. Þess vegna fer Vanessa stundum á ketó til að breyta til.
„Ef þú ert með réttu hráefnin til að halda þér á réttu brautinni þá finnst mér það frábært,“ segir Vanessa um ketó mataræðið.
„Ég er alltaf að passa upp á að ég sé að borða holla fitu, þannig ég borða MJÖG mikið af möndlusmjöri. Þú verður mjög orkurík á ketó.“
Vanessa segir að þó þessi tvö mataræði virki fyrir hana, þá þýðir það ekki endilega að það virki fyrir aðra.