Aktívistarnir Tara Margrét Vilhjálmsdóttir og Hildur Lilliendahl gagnrýna fyrirtækið Sóma, yfirleitt kennt við samlokurnar, á samfélagsmiðlum. Tara segist einfaldlega orðlaus meðan Hildur segir þetta vandræðalegt.

Ástæðan er að þær telja Sóma hafa blekkt neytendur með því að láta eins og hafragrautur þeirra sé gerður af fyrirtækinu Jömm, en það fyrirtæki er afar vinsælt meðal grænmetisæta.

Tara segir skömm af þessu. „Nú er ég orðlaus. Ég hélt að þessi hafragrautur væri nýjasta afurðin frá Jömm þegar ég sá hann enda er um algjöra stælingu á umbúðum Jömm að ræða. Hversu lágt er hægt að leggjast Sómi?,“ spyr Tara og deilir færslu Jömm en þar segir:

„Grautur er (ekki) fæddur. Við þökkum allar hamingjuóskirnar sem okkur hafa borist vegna meintrar fjölgunar en verðum sem betur fer að tilkynna að þessi hafragrautur er rangmæðraður og ekki frá okkur kominn. Þegar við komum (sennilega ekki) með hafragraut á markað munuð þið þekkja hann á góða bragðinu. Einhverjum þykir kannski óSómi að þessum merkingum en Júmbó hlýtur bara að hafa ruglast aðeins. Vandræðalegt. Kær kveðja, Jömm(bó)“

Líkt og fyrr segir þá blöskrar Hildi þetta líka en hún skrifar á Twitter: „Váááá. Sómi: „Hvernig getum við látið fólk halda að varan okkar sé frá Jömm eða Oatly? ÞAÐ ER ÞAÐ SEM VIÐ VILJUM, fremur en að hún sé eftirsóknarverð fyrir gæðin.“ Þvílíkur metnaður. Ógeðslega vandræðalegt. Áfram besta besta.“

Váááá. Sómi: „Hvernig getum við látið fólk halda að varan okkar sé frá Jömm eða Oatly? ÞAÐ ER ÞAÐ SEM VIÐ VILJUM, fremur en að hún sé eftirsóknarverð fyrir gæðin.“ Þvílíkur metnaður. Ógeðslega vandræðalegt. Áfram besta besta @jommnomm??? pic.twitter.com/oNwG2PyLDQ

— Hildur ♀ (@hillldur) October 30, 2019

Fyrirtækið Jömm lét ekki duga að skrifa um þetta á Facebook því það deildi á Instagram myndböndum sem sýna að starfsmenn hafi mætt og fært markaðsdeild Sóma „glaðning“. Það virðist hafa verið matur frá Jömm  og kaffi ásamt skilaboðunum: „Góðar hugmyndir eru ekki gefins en kaffi hjálpar alltaf. Gangi ykkur vel í dag.“