Þúsundþjalasmiðurinn Þorbjörg Alda Marinósdóttir, sem í daglegu tali er aldrei kölluð annað en Tobba Marinós, hyggur á landvinninga í matarframleiðslu með haustinu. Um er að ræða holla matvöru undir vörumerkinu Náttúrulega gott og verða vörurnar seldar í Bónus með haustinu.
Tobba er greinilega vel undirbúin því hún og tilvonandi eiginmaður hennar, Karl Sigurðsson, sóttu um einkaleyfi á nafninu Náttúrulega gott um miðjan febrúar á þessu ári. Í lýsingu á vef Einkaleyfastofu kemur fram að undir vörumerkið muni falla „mjöl og matvörur úr korni; haframatvæli; jarðhnetusætindi; kökur; múslí; möndlusætindi; smákökur; granóla; hafraklattar; hollustufæði.“
Þá er einnig búið að stofna fyrirtæki undir reksturinn, Náttúrulega gott ehf., en stjórnarformaður þess er móðir Tobbu, Guðbjörg Birkis Jónsdóttir. Þá er fyrirtækið skráð á heimili foreldra Tobbu í Kópavogi og heimasíða væntanleg á natturulegagott.is.
Titill matvaranna hefur skírskotun í bók sem Tobba gaf út árið 2017 sem hét Náttúrulega sætt og innihélt uppskriftir að eftirréttum, kökum og sætmeti þar sem sætugjafinn var ávextir og önnur náttúruleg sæta.