Stundum er gaman að leika sér með klassíska rétti, eins og til dæmis Hjónabandssælu. Fyrst að það er nú einu sinni Bóndadagur, ákváðum við aðeins að leika okkur með þessa klassík og prófuðum að setja Amaretto-líkjörinn í fyllinguna. Útkoman er himnesk.
Hráefni – Botn:
1 1/2 bolli hveiti
6 msk. heilhveiti
1/4 tsk. matarsódi
1/4 tsk. salt
1/2 tsk. kanill
múskat á hnífsoddi
10 msk. brætt smjör
6 msk. sykur
1/4 bolli púðursykur
1/4 tsk. möndludropar
Aðferð:
Hitið ofninn í 180°C og takið til hringlaga form, sirka 20 sentímetra stórt. Smyrjið það vel. Blandið þurrefnum vel saman í skál. Blandið síðan smjöri, sykri, púðursykri og möndludropum saman í annarri skál. Blandið smjörblöndunni saman við þurrefnin – hér er gott að hnoða á lokametrunum. Takið helminginn af deiginu og þrýstið í botninn og upp með hliðunum á forminu. Bakið í 12-14 mínútur. Leyfið botninum að kólna í 15-20 mínútur en ekki slökkva á ofninum.
Hráefni – Fylling:
1 bolli hindber
2 msk. Disaronno Amaretto
6 msk. hindberjasulta
Aðferð:
Setjið hindberin í skál og látið þau liggja í Disaronno Amaretto í 20 mínútur. Smyrjið sultunni yfir botninn og stráið síðan hindberjunum yfir en passið að vökvinn af þeim fylgi ekki með. Myljið hinn helminginn af deiginu yfir berin og bakið í 30-32 mínútur.
