Við á matarvefnum höfum tekið uppá því að spyrja þekkta Íslendinga um minningar tengdar jólamatnum. Nú er röðin komin að almannatenglinum Einari Bárðarsyni, sem hefur verið mikið á milli tannanna á fólki nýverið, ef svo má segja.

Sjá einnig: Sigríður Elín eyddi jólunum með gyðingafjölskyldu: „Þetta var furðulegasti aðfangadagsmatur sem ég hef upplifað“.

„Svínakótelettur voru á borðum minnar fjölskyldu allt mitt uppvaxtarskeið og þær eru því jólamaturinn minn. Hann hafði komið bæði frá heimili mömmu og pabba og því voru engin átök þegar þau tóku saman, um hvað væri jólamaturinn,“ segir Einar. Það sama var ekki uppi á teningnum á hans eigin heimili.

„Ég, eins og sönnum eiginmanni sæmir, gaf mínar jólamatarhefðir eftir þegar ég tók saman við mína góðu konu. Það er góður matur, hamborgarhryggur og ekki yfir neinu að kvarta þar. En við bræðurnir vöðum skafla og heiðar með fjölskyldurnar milli jóla og nýárs ef veður leyfir í sveitina til mömmu og pabba til þess að komast í svínakótelettur í raspi með brúnuðum kartöflum, rauðkáli, grænum baunum og jólaöli.“ segir hann og hlær.

„Maður grennist ekkert þann dag.“