„Þetta var miklu auðveldara en ég bjóst við,“ segir Imba Þórðardóttir sem notaði sumarfríið meðal annars til að gjörbreyta eldhúsinnréttingunni sinni.

Imba hafði lengi ætlað að breyta eldhúsinu með það að markmiði að lýsa upp rýmið. Íbúðin sem hún býr í er ekki með mörgum gluggum og því fannst henni eldhúsinnréttingin, eins og hún var, of þung fyrir heildarútlit íbúðarinnar.

Grá málning yfir kóngabláar eldhúsflísar

Kóngabláar flísar og innrétting úr kirsuberjavið Svona leit eldhúsinnréttingin út fyrir breytinguna.

Allt annað Hér má sjá breytinguna.

Fyrst málaði Imba allar veggflísarnar í eldhúsinu. Hún byrjaði á því að þrífa þær með sérstöku efni sem leysir upp alla fitu. Að því loknu grunnaði hún flísarnar og málaði tvær umferðir yfir.

„Þetta helst ekkert smá vel og er fáránlega flott.“

Imba var sömuleiðis búin að velta því fyrir sér lengi hvort hún ætti að ráða mann til að setja plastfilmur yfir eldhúsinnréttinguna eða gera það sjálf. Uppsett verð fyrir verkið eru 100 þúsund krónur svo Imba ákvað að athuga hvort hún gæti mögulega fundið út úr þessu upp á eigin spýtur.

Þykk filma

Hún keypti filmur í Bauhaus með viðaráferð og með YouTube-myndband, gamalt kreditkort, skæri og dúkahníf að vopni byrjaði hún að filma fyrstu skápahurðina.

Imba segir að filman sem hún valdi sé mjög þykk og þægileg viðureignar. Hún gat flett henni af og sett aftur á án þess að nokkuð sæist á filmunni þegar hún lagðist ekki rétt yfir flötinn.

„Ég hafði hugsað mér að gera þetta á löngum tíma og taka einn skáp í einu. En þar sem ég var orðin svo spennt að sjá útkomuna eyddi ég sex kvöldum, um 4 til 5 klukkustundum í senn, í verkið,“ segir Imba og bætir við:

„Ég var samt ekkert að flýta mér. Setti bara góða tónlist á og dúllaði mér við þetta á meðan hinir á heimilinu sváfu.“

18 þúsund

Allt í allt kostaði andlitslyftingin sem eldhúsið fékk 18 þúsund krónur. Imba er að vonum mjög sátt við útkomuna. „Það er alltaf gaman að gera eitthvað sjálfur og spara pening í leiðinni.“