Fjölskylda fimm ára gamals drengs, Murtaza Ahmadi, sem fékk áritaða knattspyrnutreyju frá fótboltakappanum Lionel Messi hefur neyðst til að yfirgefa Afganistan í kjölfar ítrekaðra hótanna, að sögn föður drengsins, Mohammad Arif Ahmadi.

Hinn ungi Murtaza birtist á forsíðum dagblaða eftir að hafa verið myndaður í keppnistreyju Argentínu, sem búin var til úr plastpoka. Í kjölfarið sendi Messi drengnum keppnistreyju sem einnig var árituð.

Mohammed, faðir drengsins, sagði fjölskylduna hafa flutt til borgarinnar Quetta í Pakistan í leit að betra lífi. Fyrst settist fjölskyldan að í höfuðborg Pakistan, Islamabad, en hár kostnaður setti strik í reikninginn.

„Lífið varð hörmung fyrir okkur,“ sagði Mohammed í samtali við The Guardian. Einnig sagði hann fjölskylduna ekki vilja yfirgefa Afganistan, en hótanirnar sem þau fengju væru alltaf að verða fleiri og alvarlegri.

Faðirinn greindir frá því að hann væri hræddur um að Murtaza yrði rænt eftir að myndir höfðu birst af honum í heimagerðu Messi treyjunni.

Afganska knattspyrnusambandið lofaði því að Murtaza og Messi fengju að hittast á vegum UNICEF þar sem Messi er eitt helsta andlit samtakanna. Þeir hafa ekki enn hist.

Faðir drengsins sagði í samtali við The Guardian að Murtaza vonist enn til þess að geta hitt hetjuna sína, Lionel Messi, besta knattspyrnumann heims.