Jeffrey Wilschke var handtekinn í borginni Olympia í Washington-ríki fyrir árás á lögregluþjón þar sem hann er sakaður um að hafa bitið, kýlt og hent steinum í lögregluþjóninn. Einnig á hann að hafa reynt að stinga lögregluþjóninn með penna og hlaupið ítrekað í burtu þrátt fyrir að hafa margoft verið skotinn með rafbyssu. Það væri líklega ekki heimsfrétt nema fyrir þá staðreynd að Jeffrey Wilschke breytti nafni sínu árið 2011 í hið þjála Beezow Doo-Doo Zopittybop-Bop-Bop.

Síðan þá hefur hann ítrekað komist í kast við lögin fyrir minni háttar afbrot, iðulega tengd eiturlyfjaneyslu og í hvert sinn rata brot hans á síður bandarískra fjölmiðla, þökk sé nafninu. Í samtali við blaðamann Wisconsin State Journal útskýrði hann nafn sitt, í stuttu máli, á þá leið að um væri að ræða tilvísun í endalausa ást í alheiminum. Beezow Doo-Doo Zopittybop-Bop-Bop hefur þráfaldlega vísað því á bug að vera veikur á geði.