Biðraðir mynduðust fyrir utan sundlaugar í Reykjavík en þær opnuðu aftur eina mínútu yfir miðnætti eftir að hafa verið lokaðar frá 24. mars, í tæpar níu vikur.

Meðfylgjandi mynd var tekin frá biðröðinni fyrir utan Vesturbæjarlaug tíu mínútum fyrir næturopnunina. Vesturbæjarlaug mun takmarka fjölda gesta við 115 manns í fyrstu lotu. Allt verður opið nema gufubað og tækjasalur vegna framkvæmda sem standa þar yfir. Þá verður til að byrja með hvorki í boði að nota hárblásara sundlaugarinnar né þeytivinduna fyrir blautu sundfötin.

Nætursundið er aðeins í boði aðfararnótt mánudags og eftir það tekur við hefðbundinn opnunartími lauganna. Í auglýsingu frá ÍTR og Reykjavíkurborg er fólk ennfremur minnt á að virða tveggja metra regluna.