Nú geta rússneskir olígarkar og aðrir rússneskir auðmenn ekki lengur keypt lúxusvarning í Bretlandi. Breska ríkisstjórnin hefur bannað útflutning á lúxusvörum til Rússland og segir markmiðið að svipta olígarka og aðra í rússnesku elítunni aðgangi að lúxusvarningi.

The Guardian segir að nú muni rússnesku olígarkarnir ekki lengur geta orðið sér úti um lúxusbíla, listaverk og rándýrar handtöskur. Sala á þessum varningi hefur fært breskum fyrirtækjum mörg hundruð milljónir punda í tekjur árlega.

Á síðasta ári nam útflutningur breskra fyrirtækja til Rússlands 2,6 milljörðum punda. Stærsti hlutinn var bílar eða um 400 milljónir en ríkir Rússar keyptu töluvert af Aston Martin, Bentley og Rolls-Royce.

Margir söluaðilar lúxusvarning höfðu hætt sölu til Rússlands af sjálfsdáðum áður en ríkisstjórnin bannaði slíkar sölur.

Helen Brocklebank, forstjóri Walpole hagsmunasamtaka lúxusverslana, sagði að samtökin styðji bannið heilshugar. Allir meðlimir þeirra séu hættir að selja lúxusvarning til Rússlands en um 250 fyrirtæki eru í samtökunum.

Uppboðsfyrirtækið Sotheby‘s hefur nú þegar hætt öllum inn- og útflutningi á listmunum frá og til Rússlands og hefur lokað skrifstofu sinni í Moskvu.  Það sama á við um uppboðshúsið Christie‘s sem hefur einnig hætt við uppboð á rússneskum listmunum sem átti að fara fram í sumar.