Frá því 2002 hafa verið seldir rúmlega 50.000 Volvo XC90 bílar í Bretlandi. Á öllum þessum tíma hefur ekki einn einasti ökumaður eða farþegi í bíl þessarar tegundar látið lífið í umferðarslysi þar í landi. Óháða rannsóknarstofan Thatcham Research segir að Volvo XC90 sé öruggasti bíllinn sem þar hefur verið prófaður.

Aðeins ein önnur bíltegund er með svipaða sögu og XC90 bíllinn en það er Audi Q7 en hann var aðeins seldur á árunum 2015 og 2016 að því er segir í umfjöllun BBC um málið.

Ein af ástæðunum fyrir árangri Volvo er að XC90 var einn fyrsti bíllinn þar sem myndavél og radar voru notuð til að vara ökumenn við hættum á veginum. Núna eru þessi kerfi orðin enn fullkomnari og stöðva bílinn ef hann fer of nálægt öðrum bíl ef ökumaðurinn gerir það ekki sjálfur. Margir aðrir bílaframleiðendur setja þessi kerfi nú í bíla sína.