Ólafur Ragnar Grímsson, fyrrverandi forseti Íslands, brást ókvæða við fréttum þess efnis að sjávarútvegsstjóri ESB hefur sagt sambandið opið fyrir því að veita Íslandi undanþágu frá sjávarútvegsstefnu sambandsins.
Costas Kadis, sjávarútvegsstjóri ESB, lét þessi ummæli falla í viðtali við Financial Times en mbl.is greindi frá málinu. Mbl.is greinir einnig frá viðbrögðum Ólafs Ragnars við þessum fréttum í færslum hans á samfélagsmiðlinum X. Spyr Ólafur Ragnar hvernig Ísland geti fengið undanþágur frá sjávarútvegsstefnu ESB þegar háttsettur erindregi segi að enginn skilji þá stefnu í raun og veru. Einnig hafi helstu stórveldi ESB kvartað undan því að sjávarútvegsstefna sambandsins sé orðin svo flókin að hún skapi erfiðleika í daglegum rekstri.
Ólafur Ragnar skrifar: „Þá segir framkvæmdastjórinn Costas Kadis við Financial Times að ESB sé að skapa NÝJA sjávarútvegsstefnu!! Mun Ísland semja um óþekkta nýja stefnu eða þá sem fyrir er, sem enginn skilur og er óstarfhæf að mati Frakklands, Þýskalands og Financial Times?!“
Gauti B. Eggertsson, hagfræðiprófessor við Brown-háskóla í Bandaríkjunum, segir að frétt mbl.is um skrif Ólafs Ragnars á X sé einhver sú furðulegasta frétt sem hann hafi lesið:
„Þetta hlýtur að vera einhver furðulegasta frétt sem ég hef lesið. Ólafur Ragnar er alveg brjálaður, hreinlega gáttaður, yfir því að Financial Times segir ESB tilbúið að veita Íslandi undanþágu er varðar stjórn eigin fiskimiða vegna þess að… enginn sem ÓRG þekkir hafi sagt þetta við hann. Sumsé, ESB gleymdi að láta hann vita.“
Gauti bendir á að sjávarútvegsstjóri ESB hljóti að teljast betri heimildarmaður um hvað raunhæft sé í samningum sambandsins og Íslands en forsetinn fyrrverandi. Gauti segir Ólaf Ragnar hata ESB og segist vera með kenningu um ástæðuna fyrir því hatri:
„Annars er umhugsunarefni hatrið hjá ÓRG gagnvart ESB. Honum leið alltaf betur í Kína, Rússlandi og Miðausturlöndum. Ég er með kenningu: Í Evrópu vissu allir að forseti skiptir engu máli í stjórnskipulagi Íslands og voru því ekki að eyða miklu púðri í opinberar heimsóknir forseta sem hafði engin völd. Fólk á fjarlægari slóðum var ekki alveg með þetta á hreinu.“
Egill Helgason fjölmiðlamaður blandar sé í umræður undir FB-færslu Gauta og segir:
„Mér finnst eiginlega frekar óviðeigandi að fyrrverandi forseti skuli ganga svona langt í pólitískri baráttu. Og svo er þetta líka furðulegur málflutningur. En er ekki bara ÓRG að setja sig í stellingar að verða leiðtogi baráttunnar gegn ESB. Þetta verður svo einhvers konar met – í framlínu stjórnmálanna í hartnær sjö áratugi? Maður spyr sig þá hvort ekki eigi að láta yngra fólk um þetta?“
Gunnar Smári Egilsson, ritstjóri Samstöðvarinnar, svarar Agli og segir að öllum sé frjálst að ræða þau mál sem þeir telja mikilvæg. Ólafur Ragnar hafi verið óhefðbundinn forseti og verði einnig óhefðbundinn fyrrverandi forseti.
