Fangavörður hefur verið sendur í leyfi frá störfum vegna gruns um brot í opinberu starfi. Fjallað er um þetta í Morgunblaðinu í dag en ekki kemur fram hvar umræddur fangavörður starfar.

Karl Ingi Vilbergsson héraðssaksóknari staðfestir að málið sé til rannsóknar.

Samkvæmt heimildum Morgunblaðsins vaknaði grunur um brot í tengslum við símhleranir á farsíma lögmannsins Gunnars Gíslasonar. Hann var handtekinn í nóvember í tengslum við rannsókn lögreglu á hinu svokallaða Raufarhafnarmáli, en það varðar stórfellda ræktun á fíkniefnum.

Í frétt blaðsins kemur fram að fangavörðurinn sé grunaður um að hafa veitt upplýsingar um gæsluvarðhaldsfanga, en það telst brot í starfi.