Arnór Sigurjónsson varnarmálasérfræðingur segir að Evrópa standi frammi fyrir tveimur kostum varðandi Úkraínustríðið. Annars vegar að halda áfram að styðja Úkraínu með sama hætti og verið hefur. Segir hann að sú aðstoð tryggi ekki sigur Úkraínu en gæti verið ávísun á uppgjöf.

Hinn kosturinn er að Evrópuþjóðir blandi sér með beinum hætti í átökin. Gefur Arnór í skyn að betra gæti verið að gera það núna en að bíða þar til Rússar hafi náð vopnum sínum á ný.

Þetta kemur fram í aðsendri grein á Vísir.is. Örn skrifar:

„Innrásarstríð Rússlands í Úkraínu er fyrsta skrefið í að endurreisa fyrrum áhrifasvæði Sovétríkjanna. Falli Úkraína er Evrópa í hættu. Leyniþjónustur bandalagsríkjanna hafa sagt að fari svo megi gera ráð fyrir árás Rússa á einhver lönd Evrópu innan fimm ára. Spurningin er því sú hvort betra sé að stíga inn í þessi átök núna eða bíða þar til Rússar hafa náð vopnum sínum á ný. Verði slík ákvörðun tekin er ekki hægt að gera ráð fyrir stuðningi bandarískra stjórnvalda með núverandi forseta við völd.“

Arnór segir að stuðningur Íslands við varnarbaráttu Úkraínu sé til fyrirmyndar og beri að halda honum áfram svo lengi sem þörf krefur.

Hann vekur athygli á fullyrðingum Zelenskys, forseta Úkraínu, um að innrás Rússa í Úkraínu marki upphaf þriðju heimstyrjaldarinnar:

„Það er rétt að taka orð Zelensky, forseta Úkraínu alvarlega þegar hann segir innrás Rússa fyrir fjórum árum marka upphaf þriðju heimsstyrjaldarinnar. Talið er að um tvær milljónir manna liggi í valnum, annaðhvort látnir eða særðir. Eyðilegging á innviðum er slík að það mun taka áratugi að bæta úr og kostnaðurinn hleypur á hundruðum milljarða dollara. Og það er engin endir á þessum átökum sem ógnar framtíð Evrópu og alls heimsins. Bandaríkin undir stjórn Trumps forseta styðja áform Rússa um að leggja Úkraínu undir sig því ekki bara hefur hann hætt öllum vopna- og fjárhagsstuðningi við landið sem forveri hans studdi heldur gagnrýnir hann Zelensky fyrir að gefast ekki upp og semja við Rússa.“

Greinina má lesa hér.