Samkynhneigður karlmaður var rekinn úr starfi sínu og sökum þessa ákvað Vinnumálastofnun að fella niður rétt hans til atvinnuleysisbóta í tvo mánuði þar sem hann hefði sjálfur borið ábyrgð á starfslokum sínum. Maðurinn vildi þó meina að honum hefði verið sagt upp vegna kynhneigðar hans, en ekki sökum þess að hann hafi ekki staðið sig í starfi. Þetta kemur fram í úrskurði úrskurðarnefndar velferðarmála sem staðfesti ákvörðun Vinnumálastofnunar.
Úrskurðurinn féll í sumar en var birtur í vikunni en þar má finna skrautlegar lýsingar á starfslokum mannsins.
Af úrskurðinum má ráða að viðkomandi maður hafi talið sig of hæfan til starfsins sem hafði með meðferð matvæla að gera. Vinnuveitandinn sagði honum upp störfum með vísan til þess að hann fylgdi ekki öryggisreglum um meðferð matvæla og eins hefði hann verið erfiður í samskiptum. Meðal annars hafi hann ógnað samstarfsfólki og stjórnendum með þeim afleiðingum að kalla þurfti til lögreglu í eitt skiptið þar sem maðurinn var handtekinn.
Maðurinn þvertók þó fyrir þessa lýsingu. Hann hefði orðið fyrir barðinu á bæði einelti og fordómum. Uppsögnina megi rekja til þess að stjórnendur hafi komist að því að hann er samkynhneigður. Annað væri bara fyrirsláttur. Virðist maðurinn hafa sent langa greinagerð bæði til Vinnumálastofnunar sem og til úrskurðarnefndarinnar þar sem hann taldi sig meðal annars knúinn til að koma því á framfæri að þó að hann hefði fengið byssu gefins árið 2022 hefði hann aldrei notað hana og eins þótti honum fáránlegt að saka hann um að vera erfiður í samskiptum í ljósi þess að hann hefði verið „þekktur rithöfundur og blaðamaður frá því í byrjun árs 2020“ og sökum þess tekið hundruð viðtala við „háttsettar persónur víðsvegar að úr heiminum“.
Það sem fyrrum vinnuveitandi kalli erfið samskipti væru eðlileg viðbrögð við einelti, en maðurinn sagðist hafa þann veikleika að vera viðkvæm manneskja sem líki ekki að verða fyrir einelti en taldi sig þó hafa tjáð tilfinningar sínar á viðeigandi hátt. Loks harðneitaði hann að hafa verið handtekinn.
Vinnumálastofnun taldi gögn sýna að maðurinn hefði verið handtekinn. Eins lægi fyrir að hann hafi átt í ágreiningi á vinnustaðnum, hafi ekki farið eftir öryggisreglum og hafi þar að auki talið sig alltof menntaðan og hæfan til að gegna starfinu. Samkvæmt lögum ber þeim sem verður valdur að eigin uppsögn án gildra skýringa að sæta biðtíma eftir greiðslu atvinnuleysisbóta. Engin ástæða sem maðurinn hafi gefið fyrir uppsögn sinni geti talist gild.
Undir þetta tók úrskurðarnefndin og staðfesti ákvörðun Vinnumálastofnunar.
