Fjölmiðlamaðurinn og háðfuglinn Stefán Einar Stefánsson gefur lítið fyrir gagnrýni „vinstri-elítunnar“ á brandara hans um rithöfundinn Nönnu Rögnvaldardóttur.
Brandarinn féll í hlaðvarpinu Þjóðmál þann 2. janúar en þar sagði Stefán Einar:
„Mér fannst nú Nanna Rögnvaldar ekki smekkleg kona, en svo virðist hún hafa farið á Ozempic og hún er bara orðin eins og færeyskt skerpukjöt. Hver vill borða mat frá svona konu? Mynduð þið kaupa matreiðslubækur frá henni? Ég bara missi matarlystina við tilhugsunina.“
Sjá einnig: Hraunað yfir Stefán Einar vegna ummæla hans um Nönnu – „Þetta er viðurstyggð“
Skerpukjöt er vindþurrkað kindakjöt og er þjóðaréttur Færeyinga. Það var Hjalmtýr Heiðdal, formaður Íslands-Palestínu, sem birti í dag klippu úr Þjóðmálum með áðurnefndum brandara, en myndbandið hefur vakið hörð viðbrögð.
Nanna sjálf segir í samtali við Vísi að hún hafi bara hlegið þegar hún sá klippuna; henni detti ekki til hugar að taka neinu illa sem komi frá manni eins og Stefáni Einari. Hún bendir á að í fyrsta lagi sé hún hætt að skrifa matreiðslubækur, þó hún hafi selt um hundrað þúsund slíkar í gegnum tíðina, og eins reiknar hún með því að þó nokkrir landsmenn hafi eldað eftir uppskriftum hennar. Hún bendir eins á að hún sé ekki á þyngdarstjórnunarlyfjum heldur hafi hún farið í hjáveituaðgerð og náð þannig að losa sig við um fimmtíu kíló með tilheyrandi heilsubót.
„Það er engin ástæða til að vera reiður fyrir mína hönd. Ég hlæ bara að þessu.“
Stefán Einar hefur nú birt færslu vegna málsins þar sem hann segir að enn og aftur sé „vinstri-elítan í landinu“ að missa sig út af engu.
„Í upphafi árs, á vettvangi Þjóðmála, gerði ég matreiðsluskrif Nönnu Rögnvaldar að umtalsefni og í miklum hálfkæringi. Tíu dagar liðu þar til helsti stuðningsmaður morðsveita Hamas og Pol Pot í Kambódíu, Hjálmtýr Heiðdal, ákvað að snúa þessu upp á versta veg og á eftir kom geðslegasta hirð landsins, Reynir Traustason og aðrir viðlíka og hneykslast þeir ægilega fyrir hönd Nönnu.“
Stefán Einar minnir á að þeir félagar í Þjóðmálum hafi ítrekað bent á það að í þáttunum rýni þeir þjóðmálin með skopgleraugun á nefbroddinum.
„Það kann að svíða undan og eitthvað af því er á marklínunum sjálfum. Stundum stígum við yfir þær, en það gerir ekkert til. Ekki á meðan vinstra liðið ærist að launum. Þjóðmál stunda stjórnmálaumræðu og uppistand jöfnum höndum. Fegurðin felst í því að láta skynsamt fólk greina þar á milli.“
Segir Stefán að það sé öllu áhugaverðara að skoða orðræðu gagnrýnenda. Hann hafi nú verið kallaður moldvarpa, nasisti, viðbjóður og fleira.
„Það eru ummæli sem látin eru falla um meint ósmekklegheit eða gífuryrði mín! Hvað er hægt að segja um eða við svona fólk? Svarið er einfalt: ekkert. Það á ekki að eyða orðum á svona barnaskap.“
Fjölmiðlamaðurinn segir að Þjóðmál séu á miklu flugi og njóti mikilla vinsælda. Hann notar svo tækifærið og hnýtir í Samfylkinguna og minnir á ummæli framkvæmdastjóra þingflokksins, Þórðar Snæs Júlíussonar, um konur sem féllu á bloggsíðu sem hann hélt úti á árum áður, en það var einmitt Stefán Einar sem vakti athygli á þeirri orðræðu í aðdraganda þingkosninganna 2024. Varð umræðan til þess að þingmennsku Þórðar var slaufað áður en hún hófst.
Stefáni Einari er þó bent á það í athugasemdum að það séu ekki bara vinstrimenn sem hafi móðgast yfir brandaranum og þó að það sé gott að Nanna hafi ekki tekið þessu illa þá afsaki það Stefán ekki. Aðrir vísa í orð Nönnu um að hún sjái ekkert tilefni til þess að aðrir móðgist fyrir hennar hönd.
Samkvæmt samtali Stefáns Einars við Vísi fyrr í dag átti brandarinn að varpa ljósi á að helsti álitsgjafi Íslands um mat hafi þurft að fara í magaminnkun, en meirihluti þjóðarinnar sé í yfirþyngd.
„Mér finnst ágætt að sjá þessa menningarelítu ærast með þvílíkum gífuryrðum í minn garð. Þetta er hluti af því fólki sem hefur stýrt umræðunni með slaufunarmenningu síðustu ár. Ástæða þess að þau bregðast svona við er sú að fólk er hætt að taka mark á þeim. Við megum segja það sem okkur finnst og við megum grínast með þau og menningarelítuna og alla þessa styrklega hjá hinu opinbera.“
Eins og Stefán Einar bendir sjálfur á er þetta ekki í fyrsta sinn sem brandarar Þjóðmála valda fjaðrafoki. Einkum eru það svokölluð björkvöld hlaðvarpsins sem hafa vakið athygli en þá eru þáttastjórnendur gjarnan grófari en vanalega. Eftir eitt slíkt uppþot í apríl á síðasta ári minnti Stefán Einar á að enginn er þvingaður til að hlusta á þættina og að eina dauðasyndin að hans mati sé að vera leiðinlegur.
Sjá einnig: „Fólk þarf ekki að mæta og það þarf ekki að hlusta”
