Nokkuð hefur verið rætt um hugmyndir sem reifaðar eru í greinargerð með frumvarpi fjármála- og efnahagsráðherra um veggjöld á leiðum til og frá höfuðborgarsvæðinu, til að mynda Reykjanesbraut og Suðurlandsvegi. Hefur þetta vakið töluverða óánægju á samfélagsmiðlum og hjá stjórnarandstöðunni. Ráðherra umhverfismála fullyrðir hins vegar að ekkert slíkt standi til og þessi áform hafi ekki verið rædd í ríkisstjórn. Segir ráðherrann raunar að um þvætting sé að ræða af hálfu þeirra sem haldi öðru fram.
Um er að ræða frumvarp Daða Más Kristóferssonar fjármála- og efnahagsráðherra um innviðafélag. Í frumvarpinu segir að tilgangur félagsins sé að hrinda í framkvæmd uppbyggingu stórra þjóðhagslega mikilvægra samgönguverkefna og tryggja fjármögnun og hraðari framvindu slíkra framkvæmda.
Samkvæmt frumvarpinu yrði félaginu heimilt að innheimta veggjöld fyrir notkun samgöngumannvirkja í samræmi við 17. greina vegalaga en í greininni eru ýmis ákvæði og skilyrði fyrir gjaldtöku af samgöngumannvirkjum.
Í greinargerð með frumvarpinu segir:
„Að auki var skoðað að leggja félaginu til mannvirki sem þegar hefur verið byggt og taka upp innheimtu veggjalda og var greiningin gerð miðað við að það væru Hvalfjarðargöng sem félaginu yrðu lögð til. Áætlunin gerði ráð fyrir hóflegum veggjöldum miðað við forsendur um metinn greiðsluvilja samkvæmt rannsóknum. Innheimta veggjalda í Hvalfirði myndi hefjast 2028 á sama tíma og tvöföldun ganganna yrði sett í undirbúning og framkvæmd hafin 2030. Með slíkum ráðstöfunum lækkar þörf á framlagi frá ríkinu verulega, eða í 27 milljarða kr.“
„Mögulegt er að skoða fleiri þegar byggð mannvirki í þessu samhengi, til að mynda Reykjanesbraut og Suðurlandsveg, en með slíkum aðgerðum væri innheimta veggjalda á öllum helstu leiðum til og frá höfuðborgarsvæðinu sem í fælist ákveðin sanngirni þar sem byrðum yrði dreift á vegfarendur hvar sem þeir byggju eða störfuðu. Ekki liggur fyrir nákvæm greining á því hvað framlag ríkisins myndi lækka við slíka ráðstöfun en ljóst er að hún getur lækkað verulega.“
Miðað við þessi orð hefur gjaldtaka á Reykjanesbraut og Suðurlandsveg ekki verið skoðuð til hlítar en sá möguleiki þó talinn vera til staðar en vart er er hægt að túlka þessi orð þannig að nú þegar hafi verið ákveðið að ráðast í þessa gjaldtöku. Þó hefur borið á slíkum fullyrðingum.
Vilhjálmur Árnason þingmaður Sjálfstæðisflokksins og bæjarstjóraefni flokksins í Reykjanesbæ skrifar í Facebook-pistli:
„Sveitarstjórnir þeirra svæða sem þetta mun bitna mest á, og sérstaklega í Reykjanesbæ, verða að bregðast strax við og mótmæla þessum áformum harðlega. Þessi áform mega ekki ná fram að ganga nema kílómetragjöld og vörugjöld á bifreiðar séu afnumin áður.“
Fjallað er um þennan hluta greinargerðarinnar og orð Vilhjálms í frétt Vísis.
Jóhann Páll Jóhannsson umhverfis-,orku- og loftslagsráðherra deilir frétt Vísis á Facebook með eftirfarandi orðum:
„Þetta er auðvitað þvættingur og moldviðri út af engu. Engin áform uppi um neitt í þessa veru og slíkt aldrei verið rætt í ríkisstjórn. Næsta mál.“
Í athugasemdum við færslu Jóhanns Páls er honum hins vegar bent á áðurnefnd orð í greinargerðinni með frumvarpi fjármálaráðherra og að ekki sé samhljómur á milli greinargerðarinnar og orða umhverfisráðherrans:
„Er þetta fjármálaráðherra að sýna frumkvæði?“
