Eyþór Þorbergsson, saksóknari hjá embætti Lögreglustjórans á Norðurlandi eystra, reyndi að fá Gunnar Gíslason úrskurðaðan vanhæfan sem verjanda albansks manns sem ákærður var fyrir fíkniefnabrot og peningaþvætti.

Héraðsdómur Norðurlands eystra kvað nýlega upp úrskurð sem tengist málarekstrinum gegn Albananum en þar var tekin afstaða til annars vegar þeirrar kröfu Eyþórs Þorbergssonar saksóknara um að Gunnar Gíslason yrði úrskurðaður vanhæfur sem verjandi mannsins og hins vegar til þeirrar kröfur ákærða um að Eyþór yrði úrskurðaður vanhæfur sem saksóknari í málinu.

Sat í rúmlega tvær vikur í gæsluvarðhaldi

Gunnar sat í gæsluvarðhaldi um rúmlega tveggja vikna skeið seint á síðasta ári í tengslum við rannsókn Lögreglunnar á Norðurlandi eystra á hinu svokallaða Raufarhafnarmáli, en það varðaði stórtæka ræktum fíkniefna. Gunnar sagði gæsluvarðhaldið tilhæfulaust og að hann hygði á miskabótamál. Hann sagði ennfremur í viðtali við DV 8. desember 2025:

„Þeir byggðu allar sínar kröfur, um hlerun, húsleit, eftirfylgd, gæsluvarðhald og einangrun á því að ég væri samverkamaður eða hlutdeildarmaður í þessu Raufarhafnarmáli. Það var fjarstæðukennt og það var bara vegna þess að tveir sakborningar í því máli voru skjólstæðingar mínir. Ég var verjandi annars þeirra í málinu og hinn var skjólstæðingur minn frá fyrri tíð.“

„Ég tel að lögreglan sé að reyna að nota mig og komast í vinnugögnin mín af því ég er bara mjög vinsæll meðal Albananna. Ég held því að þeir séu að reyna að komast í vinnugögnin mín svo þeir geti fundið höfuðpaurana í þessu Raufarhafnarmáli.“

Sakaður um að aðstoða við skipulagða brotastarfsemi

Ákæruvaldið byggði kröfu sína um vanhæfi verjandans á því að hann sé undir rökstuddum um alvarleg afbrot. Hann sé meðal annars grunaður um að hafa aðstoðað Albani við komu til landsins sem lið í skipulagðri brotastarfsemi. Lögreglustjóri hafi kvartað yfir honum til Lögmannafélags Íslands og krafist þess að lögmannsréttindi hans verði afturkölluð eða hann sviptur þeim tímabundið. Er byggt á því að koma ákærða til landsins sé liður í sams konar starfsemi, hann hafi komið hingað til að fremja afrot. Lögmaðurinn geti því ekki gætt hagsmuna hans.

Ákærði byggði kröfu sína um vanhæfi Eyþórs Þorbergssonar sem saksóknara í málinu á því að hann beri kala til lögmannsins Gunnars Gíslasonar. Ákærði verði að geta treyst því að sækjandi sé óhlutdrægur en Eyþór sé það ekki vegna óvildar í garð lögmannsins og það geti skaðað málstað ákærða.

Lýsti Gunnar því yfir í sínum málflutningi að hann hataði Þorberg og að hann hafi meðal annars kallað hann hrotta í viðtölum við fjölmiðla. Telur ákærði að andúðin milli mannanna sé gagnkvæm.

Kröfum um vanhæfi hafnað

Niðurstaða Héraðsdóms Norðurlands eystra í sínum úrskurði er að kröfum beggja um vanhæfni er hafnað. Eyþór Þorbergsson verður því áfram saksóknari í málinu og Gunnar Gíslason er skipaður verjandi albanska sakborningsins.

Þessi úrskurður var kveðinn upp 13. febrúar og þann 20. febrúar staðfesti Landsréttur úrskurðinn.

„Rasískur“ málflutningur

Gunnar ræddi málið stuttlega við DV og sagði: „Í stuttu mál þá var málatilbúnaður lögreglunnar frekar rasískur. Að vegna þess að ákærði væri Albani þá hlyti ég með einhverjum hætti að vera viðriðinn meint brot hans. En það segir mest um fulltrúa lögreglunnar á Akureyri og lögreglustjóra sjálfan, um hæfni þeirra í starfi.“