27 prósent félagsmanna verkalýðsfélagsins Einingar-Iðju í Eyjafirði hafa frestað eða hætt við læknisheimsókn vegna kostnaðar. Hlutfallið hefur aldrei verið hærra. 20 prósent hafa frestað eða hætt við lyfjakaup.

Þetta kemur fram í könnun sem Gallup gerði fyrir Einingu-Iðju undir lok síðasta árs og var nýlega birt á vefnum Akureyri.net. En könnunin sýnir versnandi stöðu félagsmanna.

Í könnuninni kemur fram að 44 prósent hafi miklar eða frekar miklar áhyggjur af fjárhagsstöðu sinni. 55 prósent búa í eigin húsnæði en 35 prósent í leiguhúsnæði. 20 prósent telja sig búa við lítið húsnæðisöryggi.

Yfirdráttur og smálánin erfiðust

Eins og áður segir hefur stór hluti félagsmanna frestað eða hætt við að leita sér heilbrigðisþjónustu vegna kostnaðar. Hlutfallið er enn þá hærra þegar kemur að tannlæknaþjónustu, en 44 prósent hafa frestað eða hætt við að leita til tannlæknis.

Kemur fram að tæplega helmingur, það er 49 prósent, séu með húsnæðislán og 16 prósent hafa breytt úr óverðtryggðum í verðtryggð til þess ða lækka greiðslubyrðina. 27 prósent eru með yfirdráttarlán og 11 prósent með smálán. Um 20 prósent segjast eig erfitt með að greiða af lánum, sérstaklega yfirdrætti og smálánum.

Neikvæðar breytingar á leikskólum

Þá hafa breytingar á opnunartíma og hækkanir leikskólagjalda komið illa við hópinn. En 87 prósent fólks með barn á leikskóla hafa orðið fyrir barðinu á þeim. 44 prósent eru mjög eða frekar ósátt við þetta og sama hlutfall hefur þurft að stytta vistunartíma. Stór hópur hefur þurft að breyta eða stytta vinnutímann, eða stytta dagvinnutímann og aukið vinnu utan dagvinnu.

Að lokum kemur fram að um 60 prósent hafa ekki fengið styttingu vinnuvikunnar. Meðalvinnustundafjöldi eru 44 tímar á viku.

Könnunin var lögð fyrir 3 þúsund félagsmenn Einingar-Iðju. Svarhlutfallið var 47 prósent.