Íslendingar líta heldur á Bandaríkin sem andstæðing en bandamann. Þetta kemur fram í nýrri könnun Maskínu en þar telja 40,3 prósent Bandaríkin vera andstæðing en 32,1 prósent telja Bandaríkin bandamann. 24,6 prósent voru ekki viss.

Þjóðin er því töluvert klofnari í afstöðu sinni heldur en nágrannar okkar í Danmörku en þar sögðust 60 prósent líta á Bandaríkin sem andstæðing en aðeins 17 prósent sem bandamann.

Það vekur athygli hversu mikill munur er á afstöðu íslensku þjóðarinnar eftir kyni og stjórnmálaskoðunum. 49,1 prósent kvenna líta á Bandaríkin sem andstæðing en aðeins 32,1 prósent karla. Bandaríkin eru vinsælust meðal hægrimanna. Mikill meirihluti Miðflokks lítur á Bandaríkin sem bandamann, eða 68,7 prósent, og það sama á við um 57,6 prósent Sjálfstæðismanna. Framsóknarmenn eru klofnir, þar segja 36,3 prósent Bandaríkin vera andstæðing en 32,8 prósent segja Bandaríkin bandamann. Enginn Pírati lítur á Bandaríkin sem bandamann.

Unga fólkið lítur síður á Bandaríkin sem bandamann en eldri kynslóðirnar.