Uppfært og leiðrétt: Ekki var um mannasaur að ræða eins og haldið er fram í fréttinni heldur blauta mold. Sökudólgarnir voru börn sem gleymdu sér í leik sínum. Beðist hefur verið afsökunar á sóðaskapnum við íbúa og grindverkið hreinsað. 

Fyrir um viku síðan var mannasaur makað víðsvegar á grindverk í kringum heimili miðaldra hjóna í Garðinum í Suðurnesjabæ. Dóttir konunnar sem býr þar, Shelamarl Diaz, birti myndband af ummerkjunum í íbúahópi á Facebook. Hún skrifar:

„Þetta gerðist hjá mömmu við Heiðarholtinu.

Ef einhver hefur séð einhvern gera þetta væri það mjög hjálpsöm að komast að því hver gerði þetta.

Þetta gerðist fyrir ca viku síðan.

Mamma vildi ekki pósta þessu og koma með leiðindi.

En ég var að taka eftir þessu núna og finnst þetta bara ekki í lagi

Erum með myndavél í garðhúsinu en útaf trjánum sést ekki það vel út á götu.“

Shelamarl segir í samtali við DV að engar nágrannaerjur hafi verið í gangi og móðir hennar og stjúpfaðir eigi ekki í deilum við neinn. „Kom okkur alveg á óvart, “ segir hún og hefur enga skýringu á þessu furðulega og lágkúrulega framferði.