Karlmaður var í desember dæmdur í 9 mánaða skilorðsbundið fangelsi fyrir brot í nánu sambandi, líkamsárás og akstur undir áhrifum. Báðar árásirnar beindust gegn konum og þá sérstaklega gegn höfði þeirra. Dómurinn féll þann 18. desember sl. í Héraðsdómi Norðurlands eystra en var birtur á vefsíðu dómstóla í dag.
Fyrri árásin átti sér stað þann 25. apríl árið 2024 og var myndbandsupptaka af henni lögð fram fyrir dómi. Upptökunni er lýst með eftirfarandi hætti:
„Þar sést ákærði ýta við brotaþola, ganga svo til hennar og ýta henni þannig að hún fellur í jörðina. Þegar brotaþoli stendur upp kýlir ákærði hana af miklum krafti í andlitið með krepptum hnefa hægri handar og brotaþoli fellur fram fyrir sig í götuna. Sést ákærði í kjölfarið taka um þrjú skref afturábak og með tilhlaupi setja vinstri fót fram fyrir sig og sparka af öllu afli í höfuð brotaþola með hægri fæti þar sem hún liggur í götunni.“
Brotaþoli er sambýliskona og barnsmóðir ákærða. Hún lagði ekki fram bótakröfu í málinu og var meðal vitna hvað seinni líkamsárásina varðar.
Seinni árásin átti sér stað þann 3. ágúst sama ár. Þar kýldi ákærði konu, sem hann sagðist aldrei hafa séð áður, í andlitið með þeim afleiðingum að hún féll og skall með höfuðið á gangstéttina. Ákærði hafði þarna sjálfur orðið fyrir hrottalegri líkamsárás þar sem annar maður hafði stungið hann ítrekað með eggvopni. Brotaþolinn hafði séð sambýliskonu ákærða í átökum við aðra konu og reyndi að stilla til friðar. Þá veittist ákærði að henni og kýldi hana niður. Vitni komu fyrir dóm og lýstu því flest að ákærði hefði kýlt brotaþola. Aðeins eitt vitni bar á annan veg, en það var sambýliskonan sem vildi meina að ákærði hefði dottið á brotaþola og þannig hefði hún skollið í gangstéttina. Hann hefði engan kýlt.
Árásin náðist á öryggismyndavél lögreglu og af upptökunni fór ekki á milli mála að ákærði hafði virkilega kýlt brotaþola í andlitið með áðurnefndum afleiðingum. Vildi ákærði þó meina að þetta væri honum refsilaust þar sem hann hefði verið í mikilli geðshræringu eftir hnífstungu og ekki með réttu ráði. Dómari tók fram að þó að ákærði hefði verið í ójafnvægi þá breyti það því ekki að brotaþoli hafði ekkert gert á hans hlut. Höggið var veitt af ásetningi, jafnvel þó að ásetningurinn hafi verið þokukenndur. Hins vegar taldi dómari rétt að líta á hugarástand ákærða sem refsimildunarástæðu.
Brotaþoli var í framhaldinu greind með eftirheilahristingsheilkenni og þurfti að leita til sjúkraþjálfara. Það brotnaði upp úr tönn hjá henni, sauma þurfti eitt spor í hnakka hennar og eins var hún með brákað rif sem gerði henni erfitt um að anda. Flytja þurfti hana með sjúkrabifreið af vettvangi. Ákærða var gert að greiða henni miskabætur upp á 600 þúsund krónur en eins þarf hann að greiða kostnað vegna sjúkraflutnings og læknisvottorðs.
Ákærði var dæmdur í 9 mánaða fangelsi, skilorðsbundið til tveggja ára, en áður hafði hann verið dæmdur fyrir líkamsárás árið 2024 og eins hafði hann árið 2019 verið dæmdur til sektargreiðslu fyrir akstur undir áhrifum fíkniefna og án ökuréttinda. Þriðja brotið sem hann var dæmdur fyrir að þessu sinni var einmitt fíkniefnaakstur og þarf hann nú að greiða 200 þúsund króna sekt og sæta ökuréttarsviptingu í 18 mánuði.
