Hæstiréttur Íslands hefur synjað Lútheri Ólasyni um áfrýjunarleyfi vegna dóms sem féll gegn honum í Landsrétti undir lok síðasta árs.
Þar hlaut Lúther dæmdur í skilorðsbundið fangelsi og greiðslu hárrar sektar fyrir meiriháttar skattalagabrot í rekstri byggingafélaga ásamt þremur samverkamönnum sínum, þeim Hermanni Ragnarssyni, Armando Luis Rodriguez og Theódór Heiðari Þorleifssyni.
Sluppu við atvinnurekstrarbann
Athygli vekur að Héraðssaksóknari fór fram á að mennirnir yrðu dæmdir í atvinnurekstrarbann vegna málsins en dómarar málsins, á tveimur dómsstigum, féllust ekki á þá kröfu. Meðal annars vegna þess að hluti brotanna átti sér stað áður en ákvæðið um atvinnurekstrarbann, sem ætlað er að stemma stigu við kennitöluflakki og notkunar á félögum með takmarkaða ábyrgð í vafasömum tilgang, var lögfest árið 2019.
Í dómi Landsréttar kemur fram að Lúther, sem neitað alfarið sök, hlaut 12 mánaða skilorðsbundinn dóm og var gert að greiða 51 milljónir króna í sekt, sem var lækkun um fjórar milljónir úr héraði, fyrir að hafasem stjórnarmaður og framkvæmdastjóri Stapafells ehf., sem nú hefur verið úrskurðað gjaldþrota, staðið skil á efnislega röngum skattframtölum félagsins gjaldárin 2017 til og með 2019 vegna rekstraráranna 2016 til og með 2018. Meðal annars snerust brot Lúthers um að hafa fært til gjalda tilhæfulausa reikninga frá félögum sem samverkamenn hans stóðu að, meðal annars félaginu Hornbjargi ehf.
Hermann hlaut sjö mánaða skilorðsbundinn dóm og 15 milljón króna sekt fyrir svipaðar sakir. Hann var dæmdur fyrir að hafa staðið skil á efnislega röngu skattframtali, sem stjórnarformaður og framkvæmdastjóri félagsins HR Bygg ehf, áður Parket og smíðar ehf, gjaldárið 2019 vegna rekstrarársins 2018 með því að færa til gjalda í skattskilum þess kostnað á grundvelli rangra og tilhæfulausra reikninga frá öðrum félögum, meðal annars áðurnefndu Hornbjargi ehf.
Annar neitaði sök en hinn játaði
Armando og Theódór,
sem eiga sakaferla að baki, voru síðan sakfelldir fyrir meiriháttar brot á skattalögum og lögum um bókhald vegna að komu sína að rekstri félagsins Hornbjargs ehf. Armando og Theódór hlutu báðir 12 mánaða fangelsisdóm, þar af níu þeirra skilorðsbunda, og var þeim gert að greiða 50 milljón króna sekt hvor.
Theódór var stjórnarmaður og framkvæmdastjóri félagsins og Armando varastjórnarmaður og daglegur stjórnandi þess. Stóðu þeir ekki skil á virðisaukaskattsskýrslum félagsins vegna neinna uppgjörstímabila rekstrarárin 2017 og 2018 og svo og með því að hafa staðið skil á efnislega röngum virðisaukaskattsskýrslum félagsins vegna uppgjörstímabila rekstrarárið 2018. Jafnframt með því að hafa ekki staðið ríkissjóði skil, í samræmi við lög um virðisaukaskatt, á virðisaukaskatti. Armando neitaði alfarið sök í málinu en Theódór gekkst við brotunum og gaf þá skýringu að hann hefði verið í mikilli óreglu á þessum árum.
