Einstaklingur hefur verið ákærður fyrir hegningarlagabrot, fíkniefnalagabrot og brot gegn barnaverndarlögum með því að hafa árið 2023 stofnað lífi og heilsu barns í hættu með því að skilja eftir hlaupbangsa með kannabis sem barnið komst í. Barnið var flutt með forgangsakstri sjúkrabifreiðar á Landspítalann og lagt inn á gjörgæslu með eitrun.

Í nafnhreinsaðri ákæru sem DV hefur undir höndum er viðkomandi ákærður fyrir brot gegn 4. mgr. 220 gr. almennra hegningarlaga og 98. gr. barnaverndarlaga:

Hættubrot og brot gegn barnaverndarlögum, með því að stofna á ófyrirleitinn hátt lífi og heilsu drengsins A, kt. [ ], í augljósan háska og vanrækja umönnun hans þannig að lífi hans og heilsu hans var hætta búin, laugardaginn [ ], með því að hafa að [ ], skilið eftir hlaupabangsa sem innihélt kannabis (THC gúmmibangsa) sem drengurinn komst í og innbyrti tvo til þrjá þeirra, með þeim afleiðingum aðhann missti meðvitund og hlaut eitrun og var  síðan fluttur með forgangi í sjúkrabifreið frá [ ] á Landspítalann, þar sem hann var lagður inn á gjörgæslu vegna alvarlegrar meðvitundarskerðingar en hann svaraði einungis verulega sársaukafullu áreiti og var með merki eitrunar en þvagsýni hans gaf til kynna að hann væri undir áhrifum kannabis.

Viðkomandi er einnig ákærður fyrir fíkniefnalagabrot, með því að hafa, þann 2. júlí 2023, haft í vörslum sínum samtals 4,58 g af kannabisblönduðu efni, 48,85 g af kannabislaufum og 0,47 g af amfetamíni, sem lögreglan fann við leit á heimili ákærða.

Þess er krafist að ákærði verði dæmdur til refsingar og til greiðslu alls sakarkostnaðar. Jafnframt er krafist upptöku á þremur kannabisblönduðum hlaupaböngsum 4,58 g, 48,85 g af kannabislaufum og 0,47 g amfetamíni.

Málið verður tekið fyrir í Héraðsdómi Reykjaness þann 22. janúar og verður þinghald lokað.