Lögreglumenn í Utah notuðu gervigreind til þess að skrifa lögregluskýrslu af atviki með stórundarlegum afleiðingum. Í skýrslunni stóð að einn þeirra hefði breyst í frosk.

Fréttastofan UPI greinir frá þessu.

Lögreglumenn í bænum Heber City byrjuðu í síðasta mánuði að nota tvö gervigreindarforrit í störfum sínum. Það er Draft One og Code Four til þess að skrifa upp lögregluskýrslur. Eru skýrslurnar byggðar á efni sem kemur úr búkmyndavélum lögreglumanna.

Í einni skýrslunni stóð að lögreglumaður hefði breyst í frosk. Sem gerðist ekki í raun og veru.

„Hugbúnaðurinn í búkmyndavélinni og gervigreindin sáu bíómyndina sem var í gangi í sjónvarpi í bakgrunninum. Það var myndin „Prinsessan og froskurinn,““ sagði varðstjórinn Rick Keel í sjónvarpsviðtali við Fox News. „Það var þá sem við áttuðum okkur á að við þyrftum að leiðrétta þessar gervigreindarskýrslur.“

Sagði hann að deildin myndi ekki hætta að nota gervigreindina en taka henni með meiri fyrirvara og fara betur yfir skýrslurnar. Sagði hann að gervigreindin myndi spara sér 6 til 8 tíma vinnu í hverri viku.