Þó nokkuð hefur verið rætt og ritað um þessar breytingar á Facebook og fóru fjörugar umræður fram undir færslu sem blaðamaðurinn Jakob Bjarnar Grétarsson skrifaði.
Í færslu sinni velti Jakob því upp hvað hefði breyst frá því að Guðmundur Ingi skrifaði færslu á gamlársdag. Í henni sagðist Guðmundur Ingi horfa bjartsýnn til komandi tíma og sagðist hlakka til að mæta aftur til starfa eftir að hafa náð sér eftir hjartaaðgerð sem hann gekkst undir fyrir skömmu.
Margir gagnrýndu Jakob fyrir að velta þessu upp og bentu á að Guðmundur Ingi hefði gengist undir stóra og flókna aðgerð og þyrfti tíma til að jafna sig.
„Heyrðu, góð spurning, ég fletti þessu upp og komst að því að… hédnah……það komi þér bara ekkert við,” sagði Helgi Hrafn Gunnarsson, fyrrverandi þingmaður Pírata.
„Breyttist eitthvað? Hann nefndi ekki ráðuneytið í fyrri yfirlýsingunni (sjálfsagt viljandi), bara að hann kæmi aftur til starfa,“ sagði Bergsteinn Sigurðsson þáttastjórnandi hjá RÚV.
„Aðgerðin tókst afar vel og hann hlakkar til að mæta aftur til starfa!? Þetta er ekki hægt að skilja öðru vísi en það sé til þeirra starfa sem hann fór frá,“ svaraði Jakob Bjarnar.
Jón Viðar Jónsson, einn þekktasti leiklistargagnrýnandi þjóðarinnar, lagði einnig orð í belg við færsluna og sagði meðal annars:
„Mér finnst engin ástæða að vera að skrifa svona statusa akkúrat nú. Maðurinn réði augljóslega ekki við það embætti sem honum var falið. Til þess hafði hann hvorki faglega burði né – eins og nú hefur sýnt sig – líkamlega heilsu. Svona störf eru óhemju krefjandi og ekki fyrir aðra en menn með fulla og óskerta starfskrafta.“
Jón Viðar bætti svo við að honum hefði ekki líkað meðferðin á Guðmundi Inga í Skaupinu á gamlárskvöld.
„Og eitt enn jú – úr því ég er farinn af stað – árásin á hann í Áramótaskaupinu var til hreinnar skammar. Hreinn óþverraháttur, ekkert annað. Ef RÚV hefði útvarpsstjóra þá hefði hann átt að ritskoða það og kippa því út. En RÚV er sem stendur stjórn – og stefnulaust eins og blasir við alþjóð á hverjum degi.“
