Heimasíða þar sem birtar eru færslur frá þeim sem „smætta“ dráp Charlie Kirk er skráð á Íslandi. Nafntogaðir Repúblikanar hyggjast nota þessa síðu til þess að fá viðkomandi fólk rekið úr vinnum sínum.
Eins og greint er frá á sjónvarpsstöðinni CNN heitir heimasíðan „Expose Charlie´s Murderers“ og er skráð á Íslandi.
Eins og segir í tilkynningu hafa þeir sem reka síðuna fengið um 30 þúsund ábendingar um færslur á samfélagsmiðlum þar sem dráp áhrifavaldsins Charlie Kirk er „smættað“. Verður gert úr þessu opinn gagnagrunnur.
„Síðunni verður brátt breytt í gagnagrunn þar sem hægt er að fletta upp öllum 30.000 ábendingunum, þar sem hægt er að sía út fólk eftir staðsetningu og í hvaða störfum það vinnur,“ segir á síðunni. „Þetta er varanleg og síuppfærður gagnagrunnur um róttæka aktívista sem eru að kalla eftir ofbeldi.“
Hins vegar er ekki að sjá að flest fólkið sem tekið er fyrir á téðri síðu séu róttækir aktívistar og þaðan af síður að það sé að kalla eftir ofbeldi. Flest fólkið er heldur ekki þekkt og á fáa fylgjendur á samfélagsmiðlum.
Á meðal þeirra sem hyggjast nýta sér síðuna er Laura Loomer, öldungadeildarþingmaður Repúblikana.
„Ég mun eyða allri nóttinni að tryggja að allir sem ég sé fagna dauða hans verði frægir, svo undirbúið ykkur að framtíðar atvinnuferill ykkar verði ónýtur ef þið eruð nógu sjúk til að fagna dauða hans,“ sagði Loomer í færslu á samfélagsmiðlum.
Á meðal þess sem finna má á síðunni er færsla frá vísindakonu að nafni Rebekah Jones. Hún sagði:
„Sparið vorkunn ykkar fyrir hina saklausu áhorfendur sem lenda í hakkavél MAGA skilaboðavélarinnar.“
Var þessi færsla birt á síðunni ásamt persónulegum upplýsingum um Jones. En Jones hefur áður orðið fyrir barðinu á nethrottum og þurft að leita til lögreglu vegna líflátshótana.
„Það er algjörlega klárt að þetta er samhæfð áreitisherferð,“ sagði Laura Edelson, aðstoðarprófessor við Northeastern háskólann og yfirmaður verkefnisins Cybersecurity for Democracy Project. „Þess vegna er þetta gert, til að samhæfa árásir á nafngreinda einstaklinga.“
Þegar hafa borist einhverjar frásagnir af uppsögnum. Til dæmis var Matthew Dowd, pólitískum greinanda hjá sjónvarpsstöðinni MSNBC, sagt upp eftir að hann sagði að orðræða Kirk gæti hafa verið hvati í árásinni á hann. Donald Trump forseti var einn af þeim sem hvatti til þess að Down yrði sagt upp.
Þá hafa borist frásagnir af uppsögnum kennara, bæði á háskólastigi og neðri stigum. Einnig hefur veitingastaðurinn Freddy´s Frozen Custard & Steakburgers, NFL liðið Carolina Panthers og teiknimyndaútgáfan DC Comics sagt upp fólki vegna málsins.
Athyglisvert er að þeir sem halda úti síðunni skuli ekki hafa hana skráða í Bandaríkjunum heldur á Íslandi, hjá fyrirtækinu Withheld for Privacy sem er til heimilis að Kalkofnsvegi í Reykjavík.
Margoft hefur verið fjallað um fyrirtækið enda hafa alls kyns vafasamar og ólöglegar síður falið slóð sína í gegnum það. Meðal annars netglæpamenn sem stunda fjársvik og haturssamtök. Lögreglan á höfuðborgarsvæðinu fær reglulega fyrirspurnir frá erlendum lögregluembættum vegna mála sem þessa en að sögn lögreglunnar er ekkert hægt að gera þar sem íslensk löggjöf í raun heimilar erlendum glæpamönnum að fela slóð sína hér.
