Eignir sem Vinnumálastofnun tók á leigu fyrir einstaklinga sem sótt hafa um alþjóðlega vernd hér á landi standa auðar. Vilhjálmur Árnason, þingmaður Sjálfstæðisflokksins, gagnrýnir þetta í samtali við Morgunblaðið í dag og segir að um sé að ræða „sóun á almannafé skattgreiðenda“.

Vilhjálmur lagði fyrir skemmstu fram fyrirspurn til Ingu Sæland, félags- og húsnæðismálaráðherra, um þetta þar sem fram kom að Vinnumálastofnun hefði 37 eignir og 93 hótelherbergi á leigu fyrir umsækjendur um alþjóðlega vernd.

Í frétt Morgunblaðsins er haft eftir Unni Sverrisdóttur, forstjóra Vinnumálastofnunar, að umræddir leigusamningar séu óuppsegjanlegir. Alls standi tíu hús ónotuð og útlit sé fyrir að þau muni standa tóm þar til samningar renna út. Erfiðlega hafi gengið að finna not fyrir þessar eignir.

Segir hún að ófyrirséð fækkun umsókna um alþjóðlega vernd sé ástæða þess að húsin standi tóm.

Vilhjálmur gagnrýnir í samtali við Morgunblaðið hversu mikið álag er til dæmis í Reykjanesbæ. Þannig hafi 246 umsækjendur um alþjóðlega vernd dvalið þar þann 1. maí síðastliðinn en aðeins 138 í Reykjavík.

„Mér fannst svör­in draga fram hversu mikið álag var sett á eitt sam­fé­lag um­fram önn­ur, sem mér finnst vera mjög al­var­legt mál,“ segir hann við Morgunblaðið þar sem nánar er fjallað um málið.