Hópur fólks kom saman á Austurvelli með fána Palestínu, en þegar æðsta stjórn ríkisins gekk að Alþingishúsinu að loknum hátíðarhöldum tóku mótmælendur að hrópa „þjóðarmorð“ og „frjáls Palestína“.
Athygli vakti í vikunni þegar Rósa Guðbjartsdóttir, þingkona Sjálfstæðisflokksins, gagnrýndi háttalag mótmælenda í ræðu á Alþingi. Sagði hún óboðlegt að hópar fólks komi saman á þessum degi við hátíðarhöld við þinghúsið, veifandi fána annars lands og hrópandi ókvæðisorð að ráðamönnum og öðrum viðstöddum.
„Í gær urðum við vitni að því að þjóðhátíðardeginum okkar var sýnd mikil vanvirðing hér við Austurvöll og um leið þjóðfána okkar Íslendinga. Eigum við bara að láta slíkt viðgangast?”
Sjá einnig: Rósa ósátt: Óboðleg hegðun mótmælenda í gær – „Eigum við bara að láta slíkt viðgangast?“
Egill virðist taka undir þessa gagnrýni að einhverju leyti en í færslu sinni sagðist hann vera vel meðvitaður um þá hryllilegu glæpi sem framdir eru gegn Palestínumönnum, þar á meðal í formi fjöldamorða, skipulögðu hungri og sprengjuregni.
„Og hræsnin er himinhrópandi þegar ísraelskir stjórnmálamenn hrópa á eyðingu Írans vegna þess að sprengja þaðan féll á spítala í Ísrael. Varla neinn spítali á Gaza er uppistandandi enda er markmiðið að hrekja íbúana burt. En fólk sem stendur í svona baráttu þarf að hafa einhverja strategíu – hugmyndir um hvernig má vinna málstaðnum fylgi. Og aðferðin er örugglega ekki að standa á Austurvelli á þjóðhátíðinni, veifa Palestínufánum og hrópa,“ sagði Egill.
Færsla hans vakti talsverða athygli og er skemmst frá því að segja að margir tóku undir með honum. „Allavega ekki á 17 júní, sem er aðallega fyrir börnin. Það er hægt að mótmæla alla aðra daga ársins. Við verðum að fá að gleðjast af og til þrátt fyrir hörmungar heimsins,“ sagði til dæmis í einni athugasemd.
„Svo sammála þér. Held að svona mótmæli eins og voru á 17. júní, vinni gegn samstöðu með Palestínu. Tek fram að ég styð Palestínu 100%,“ sagði í annarri.
Aðrir voru hjartanlega ósammála Agli og létu þá skoðun í ljós.
„Fólk sem stendur á Austurvelli og hrópar er að reyna að vekja athygli þeirra sem geta eitthvað gert,“ sagði til dæmis lögfræðingurinn Eva Hauksdóttir.
Aðrir tóku dýpra í árinni. „Vá, en hallærislegur status. Okkar ríkisstjórn tekur enga afstöðu gegn þjóðarmorði og þú móðgast yfir Palestínskum fána á 17 júní!!!???”
Annar tók í svipaðan streng:
„Nú ef þú veist um betri leið þá endilega deildu henni með okkur þessum vitlausu sem eru að nota strategíu sem reyndar er notuð um allan heim. Skil heldur ekkert í þér að leggja ekki eitthvað til baráttunnar annað ef gagnrýna fólk sem þó gerir eitthvað. Verulega hræsnisfullur status ef þú spyrð mig.“
