Snærós skrifar nokkuð harðorðan pistil á Facebook-síðu sína þar sem hún birtir dæmi um þennan málflutning, nú síðast frá Brynjari Barkarsyni sem hélt umdeilda ræðu á samkomu á Austurvelli á laugardag.
„Ein þrálátasta lygin sem vellur upp út rasistum landsins er sú að mamma mín hafi beinan fjárhagslegan hag af því að til Íslands komi hælisleitendur. Það líður ekki sá dagur að ég lesi ekki komment um þetta kjaftæði, og nýverið þurfti ég að leiðrétta bullið þegar það kom upp í fjölskylduspjalli vinkonu minnar,” segir Snærós í pistlinum.
Hún segir að vegna starfa sinna og móður sinnar hafi hún þagað í sex ár þegar þessu var haldið fram. „En nú þegar tengdasonur fyrrverandi forsætisráðherra heldur lyginni áfram ætla ég að leiðrétta hana í eitt skipti fyrir öll,“ segir Snærós og þar vísar í ummæli Brynjars á Facebook.
„Fyrir meira en áratug síðan tók mamma mín að sér lögmannsstörf fyrir fólk sem hingað sótti vernd eftir styrjöld í Sýrlandi. Þannig var kerfið þá og tugir lögmanna sinntu því sama. Það var sannarlega ekki mokgróði í þeim verkefnum en það er hlutverk lögmanna að taka að sér störf fyrir fólk sem á rétt á aðstoð skv. íslenskum lögum.“
Hún bendir á að árið 2014 hafi ríkisstjórn Sigmundar Davíðs Gunnlaugssonar og Bjarna Benediktssonar gert breytingar á hæliskerfinu sem fólu í sér að öll þjónusta lögmanna var færð til Rauða kross Íslands. Þar með var þessum verkefnum móður hennar lokið.
„Fyrir þau sem kunna ekki að reikna þýðir það að í 11 ár hefur þetta ekki verið vinnan hennar. Árið 2017 var mamma mín svo kjörin á þing og lagði inn lögmannsréttindi sín á meðan. Annað en sumir. Þar sat hún í sex ár, öflugust og kraftmest allra þingmanna, þar til hún ákvað að snúa aftur til lögmannsstarfa og finna næringuna í því að hjálpa fólki augliti til auglitis frekar en í gegnum svifaseint kerfi þar sem gera þarf málamiðlanir við fólk sem hefur enga mannúð í hjarta sér. Þingmenn þjóðarinnar sem aldrei hafa hitt neinn sem ekki er af þeirra eigin sauðahúsi.“
Snærós segir að móðir hennar sé duglegasta kona sem hún þekkir. „Hún er gríðarlega hörð af sér en þeirri ásjónu fylgir því miður að fólki finnst það ekki þurfa að standa upp fyrir henni. Þannig hefur samstarfsfólk í pólitík aldrei lyft litla fingri til að leiðrétta bullið og þvættinginn sem á henni hefur dunið frá sniðmenginu sem hatar útlendinga og heldur að bólusetningar séu massastjórnunartæki stjórnvalda.“
Hún bendir svo á að tvö ár séu liðin síðan hún sagði skilið við þingmennsku og varð einstaklingur á ný. Enn láti þetta fólk þó eins og á henni megi berja líkt og um kjörinn fulltrúa sé að ræða. Að sama skapi taki vinir hennar sem vita betur ekki upp hanskann fyrir hana. „Það gerum við fjölskyldan þá bara og verður ekki lengur setið hjá í þeim efnum,“ segir Snærós sem endar pistilinn á að senda fyrrverandi forsætisráðherra ákveðin tilmæli. „Við Bjarna Benediktsson vil ég segja: Settu tappa í tengdasoninn. Hann er að sverta ímynd fjölskyldu þinnar og verða ykkur til stórfelldrar skammar.“
