Íbúar við Birkimel 10 hafa hrundið af stað undirskriftalista gegn þéttingu byggðar við Birkimel 1. Fyrirhugað er að reisa fjölbýlishús á lóðinni þar sem nú er bensínstöð Orkunnar.
Íbúar við Birkimel 10, gegnt Birkimel 1, hafa hrundið af stað undirskriftalista á vefsvæðinu island.is. Var listinn stofnaður í gær og gildir til 21. júlí næstkomandi.
Þéttingin við Birkimel 1 er mjög umdeild. En þar stendur nú bensínstöð Orkunnar, nálægt Þjóðarbókhlöðunni og nýju húsi menntavísindasviðs Háskóla Íslands, það er gömlu Hótel Sögu.
Áformað er að byggja fjögurra til fimm hæða hús á lóðinni með 42 íbúðum, misstórum. Eins og sést á meðfylgjandi mynd á húsið að vera nokkuð nýstárlegt í hönnun, þrískipt og stallað. 6 bílastæði eiga að fylgja húsinu.
Er þetta hluti af samkomulagi Reykjavíkurborgar og olíufélagsins Skeljungs frá árinu 2021, um fækkun bensínstöðva og að byggð yrðu íbúðarhús á lóðunum.
Sjálfstæðismenn í minnihluta borgarstjórnar hafa gagnrýnt málið. Meðal annars Helgi Áss Grétarsson. Á vefsíðu sinni skrifaði hann:
„Það er með nokkrum ólíkindum að það sé talið til bóta að byggja svona fjölbýlishús á stað sem þessum, þar sem margar af helstu mennta- og menningarstofnunum landsins eru til húsa. Ástæða er því að hvetja sem flesta að kynna sér deiliskipulagstillöguna sem fyrir liggur og gera við hana athugasemdir, telji þeir þörf á því.“
Það gerði einnig Marta Guðjónsdóttir og vísaði í andstöðu Háskóla Íslands í því samhengi. Við Morgunblaðið sagði hún:
„Hér á að taka ofurþéttingu og gróðasjónarmið fram yfir þróunaráætlun Háskóla Íslands og í andstöðu við helstu menningar- og fræðslustofnanir á svæðinu. Svæðið milli Birkimels og Suðurgötu, Hringbrautar og Hagatorgs hefur um áratugaskeið verið talið helgunarsvæði fyrir helstu menningarstofnanir þjóðarinnar.“
Þá hefur einnig verið sett á laggirnar Facebook grúbba sem kallast „Björgum Birkimel“.
„Hér skapast vonandi umræða sem á endanum gæti sannfært borgaryfirvöld um að endurskoða skipulagsáætlanir við Birkimel, en svæðið í heild sinni felur í sér gífurleg tækifæri, sem einfaldlega verða eyðilögð, verði byggt á bensínstöðvarlóðinni,“ segir í færslu á henni.
Frestur til að skila athugasemdum í skipulagsgátt er 22. júlí næstkomandi. Hægt er að skrifa undir undirskriftalistann hér.
