Gavin Newson, ríkisstjóri Kaliforníu, var nálægt því að bresta í grát þegar hann ræddi stöðu mála vegna óeirðanna í Los Angeles og víðar.

Aðgerðir Innflytjendastofnunar Bandaríkjanna (ICE) hafa kveikt fyrrnefnd mótmæli og brást Donald Trump Bandaríkjaforseti við með því að senda liðsmenn þjóðvarðliðsins til borgarinnar. Þá hefur borgarstjórinn Karen Bass tilkynnt að útgöngubann verði í gildi frá klukkan 20 á kvöldin til klukkan sex á morgnana til að lægja mótmælaöldurnar.

„Sjáið, þetta snýst ekki bara um mótmælin hér í Los Angeles.  þegar Donald Trump sótti um heimild til að taka yfir stjórn þjóðvarðliðsins náði sú beiðni yfir hvert einasta ríki þessa lands,“ sagði Newsom í ávarpi og var honum augljóslega mikið niðri fyrir.

„Þetta snýst um okkur öll. Þetta snýst um þig. Kalifornía kann að vera fyrst, en það mun augljóslega ekki enda hér. Næstu ríki eru á dagskrá. Lýðræðið er næst. Lýðræðinu er ógnað beint fyrir augum okkar, augnablikið sem við höfum óttast er komið.“

Mótmælin í Los Angeles hófust vegna aðgerða innflytjendastofnunarinnar í borginni en hún hefur gert rassíur í borginni og handtekið ólöglega innflytjendur. Í frétt MSNBC kemur einnig fram að aðgerðasveitir ICE verði næst sendar til fjögurra borga þar sem Demókratar fara með völd: New York, Seattle, Chicago, Philadelphia og norðurhluta Virginíu.