Brynjar Barkarson hafnar því að hafa verið að vísa í Adolf Hitler þegar hann klæddist fótboltatreyju með númerinu 18 á bakinu þegar hann hélt ræðu á Austurvelli í gær. Ýmsir hafa nefnt að talan sé notuð af hægri öfgamönnum, svo sem nýnasistasamtökunum Combat 18.
Nýnasistar hafa notað töluna 18 vegna vísunar í Adolf Hitler. Það er að A er fyrsti stafurinn í stafrófinu og H sá áttundi (í því enska það er að segja). Brá því mörgum í brún þegar Brynjar steig á stokk á fundi þeirra sem vilja hefta komum hælisleitenda til Íslands í gær, með töluna á bakinu. En þar talaði hann meðal annars um að margir múslimar vildu þröngva kúgunarhugmyndum upp á okkur.
Einn af þeim sem hefur hæðst að Brynjari er fjölmiðlamaðurinn Egill Helgason. Það er fyrir Manchester United knattspyrnutreyjuna sem Brynjar klæddist.
„Það er sérlega fyndið að flytja ræðu gegn glóbalisma í Manchester United treyju. Eiginlega ekkert í heiminum er jafn glóbalíserað og einmitt enski fótboltinn,“ segir Egill í færslu á samfélagsmiðlum.
Á þeim þræði hefur einmitt tenginin við töluna 18 verið nefnd. En Brynjar mætir í þráðinn og sver af sér lotningu við Hitler.
„Kærasta min fekk þessa treyju i afmælisgjöf en hun a afmæli 18 og hefur alla tið spilað fotbolta með þvi numeri, hef ekki seð þessa hitler numera tengingu aður a ævi minni mer finnst þetta bara þæginlegur og flottur bolur,“ segir Brynjar í athugasemd.
Einnig hefur verið gagnrýnt að maður sem tali um mikilvægi íslenskrar þjóðmenningar skuli ekki tala betri íslensku en raun ber vitni og að lög eins og „Bad Bitch í Reykjavík“ séu kannski ekki endilega þjóðmenningunni til framdráttar. Brynjar svarar hins vegar fyrir tungutak sitt í þræðinum.
„tungumalid er i stodugri þroun og það er eitt að þroa moðurmalið og annað að skipta þvi út. Tjáningarfrelsi, aðskilnaður rikis og kirkju, einkvæni og ekki giftast börnum(algengt), gæti haldið lengi afram en þetta eru dæmi um stoðfætur i okkar menningu sem verður með þessu áframhaldi skipt út fyrir aðrar hugmyndir eftir nokkrar kynslóðir,“ segir hann. „ég elska islensku en tungumálið er lifandi og i stöðugri þróun og það er hluti af minni list að beygja málið og reglurnar til að miðla hugmyndum minum a þann hátt sem mer þykir flottur eða áhrifamikill.“
