Það hefur reglulega verið rætt og ritað í gegnum árin um að færa staka frídaga í miðri viku að helgum. Jón Júlíus Karlsson, samskiptastjóri Viðskiptaráðs, efnir til umræðunnar á ný í pistli á Vísi. Hann segir óvenju marga frídaga bera upp á fimmtudegi í ár. Eins og sumardagurinn fyrsti (24. apríl) og frídagur verkalýðsins (1. maí), og fram undan eru uppstigningardagur (29. maí) og þjóðhátíðardagurinn (17. júní).
„Árið 2025 er því sannarlega ár klemmudaganna. Að mínu mati er þetta fyrirkomulag óheppilegt. Þessir stöku frídagar valda því að ég næ hvorki að njóta þeirra til fulls en verkefnin í vinnunni raskast engu að síður. Persónulega væri ég miklu frekar til í að njóta langrar helgar með fjölskyldunni. Frídagur sem klemmist á milli vinnudaga getur reynst óhentugur þegar betur er að gáð,“ segir hann.
Jón segir að það hafi verið yfirgnæfandi stuðningur meðal atvinnurekenda við að færa staka frídaga að helgum. „Í könnun Gallup frá árinu 2011 kom fram að tveir af hverjum þremur kjósendum eru hlynntir því að frídagar sem ber upp í miðri viku verði fluttir upp að helgi,“ bendir hann á.
„Þetta er skiljanlegt í ljósi þess að stakir vinnudagar búa til slitróttar vinnuvikur með röskunum á samstarfi og framvindu verkefna. Einstaklingar og fjölskyldur hafa einnig beinan hag af slíkri tilfærslu. Samfelldar helgar auka tækifæri til hvíldar, ferðalaga og fjölskyldusamveru. Það býr til betra jafnvægi á milli vinnu og einkalífs, sem bætir líðan, heilsu og vinnuframlag til lengri tíma,“ segir hann.
Jón vill sjá lagafrumvarp á Alþingi um tilfærslu á frídögum, sem blandar ekki öðrum atriðum við málið, eins og fjölgun frídaga.
„Ekki þarf að líta lengra en til Bretlands og Bandaríkjanna, þar sem frídagar hafa verið færðir að helgum til að skapa þriggja daga helgar, sem eru almenningi og fjölskyldufólki afar dýrmætar,“ segir Jón.
„Hér er um að ræða hagsmunamál sem nýtur víðtæks stuðnings auk þess sem ávinningurinn er augljós fyrir bæði almenning og atvinnulíf. Ég krosslegg fingur að alþingismenn hugsi til okkar á þeim klemmudögum sem eru framundan.“
